ونەردەگى قىز-كەلىنشەكتەر حيدجابپەن قانداي قيىندىق كورىپ جۇرگەنىن ايتتى

وتاندىق شوۋ-بيزنەستەگى ەڭ كوپ تالقىلاناتىن تاقىرىپتاردىڭ ءبىرى – حيدجاب ماسەلەسى. سوڭعى جىلدارى بىرقاتار تانىمال ءانشى ورامال تاعىپ ساحناعا شىقسا, ەندى ءبىرى قىسىمعا شىداماي قايتا شەشىپ تاستاعانىن مويىندادى, دەپ حابارلايدى Qandastar.kz Stan.kz-كە سىلتەمە جاساپ.

«قۇرمەت» وردەنىنىڭ يەگەرى, ءانشى ءمولدىر اۋەلبەكوۆا Threads پاراقشاسىندا حيدجابپەن ءجۇرىپ كەدەرگىلەرگە ءجيى تاپ بولاتىنىن ايتتى. ونىڭ سوزىنشە, كەيدە كونتسەرتكە قاتىسقانىمەن, ەفيردەن قيىلىپ قالادى. «مەنى ورامالىم ءۇشىن جوبالارعا قاتىستىرمايدى. كەيدە ساحنانى ءوزىم-اق بوساتىپ بەرەيىن بە دەپ ويلايمىن. ۇيىمداستىرۋشىلار مەنى شەتتەتسە دە, حالىقتىڭ ماحابباتىن تارتىپ الا المايدى», – دەيدى ول.

جاستار اراسىندا Dequine اتىمەن تانىمال دانەليا سادىقوۆا دا ورامال تاعىپ كوردى. ءبىر جارىم جىلداي حيدجابپەن جۇرگەن ول قاجىلىققا بارىپ كەلسە دە, كەيىن شەشىپ تاستادى. «ءوزىمدى يسلامنىڭ community-نە كىرىكتىرە المادىم, يسلامداعى ادامنىڭ وبرازىنا كەلىڭكىرەمەدىم. حيدجاب كيۋىمە دە, شەشۋىمە دە وكىنبەيمىن», – دەپ ءتۇسىندىردى ءانشى.

جەكە ءومىرى ءجيى تالقىلاناتىن اقبوتا-نۇر سەيتماعامبەتوۆا دا قىسقا ۋاقىت ىشىندە ورامال تاعىپ كورگەنىن, بىراق اسىعىس شەشىم بولعانىن جاسىرمادى. «حيدجابقا دايىن بولماي كەلدىم. ۇزىن كيىممەن ونەردەن نان تابۋ قيىن بولدى. كەيىن شەشىپ تاستادىم. بىراق بۇل – كۇيزەلىستەن ەمەس», – دەدى ول.

تانىمال حيت اندەردىڭ ورىنداۋشىسى ينديرا راسىلحان بولسا, ورامال تاعۋدى جاس كەزىنەن ارمانداعانىن ايتادى. دەگەنمەن, ورامال كيگەننەن كەيىن كونتسەرتتەردەن شەتتەتىلگەنىن دە مويىندايدى. «ەفيردەن قىسقارتىلعانىمدى ءتۇسىندىم. بىراق ورامالعا كەلۋ – مەن ءۇشىن ۇلكەن ارمان ەدى. ەندى ونى سوڭعى دەمىمە دەيىن شەشپەۋدى تىلەيمىن», – دەدى ول.

قازاق ەستراداسىندا وزىندىك قولتاڭباسى بار روزا القوجا دا بەلگىلى ءبىر كەزەڭدە حيدجاب تاعىپ كورگەنىمەن, كەيىن ودان باس تارتقان. «تولىق حيدجابتا ءجۇرۋ ءۇشىن كوپ نارسەدەن باس تارتۋ كەرەك. مەن ەموتسيانىڭ ادامىمىن. مەككەدەن كەلگەن سوڭ ءبارى جالاڭاش سياقتى كورىندى. بىراق كەيىن ءوز قالپىما ورالدىم», – دەپ ءتۇسىندىردى ول.

انشىلەردىڭ بۇل تاڭداۋى الەۋمەتتىك جەلىدە قىزۋ تالقىعا ءتۇستى. ءبىرى ولاردىڭ ونەردەن كەتپەۋىن قولداسا, ەندى ءبىرى دىنگە بەت بۇرعانىنا قۋانادى. «انشىلەر دىنگە كەتسە, ساحنادان شەتتەتىلەدى», «حيدجابتىڭ سىرتىنان ساۋكەلە كيۋ دۇرىس ەمەس», «ءان ايتۋ مەن ناماز وقۋدى قاتار الىپ ءجۇرۋ مۇمكىن ەمەس» دەگەن پىكىرلەر دە ايتىلدى. كەيبىرى «اق جاۋلىقتى انانىڭ وبرازى بار, نەگە قارا ورامال تاعىلادى?» دەپ سىن ايتتى.

قورىتىندىسىندا, حيدجاب – ءسان ءۇشىن كيىلەتىن بۇيىم ەمەس, اركىمنىڭ ىشكى سەنىمى مەن جەكە شەشىمىنە بايلانىستى كۇردەلى تاڭداۋ. ونەر ادامدارىنىڭ وسى جولداعى تاجىريبەسى قوعامداعى پىكىرتالاستى ءالى دە جالعاستىرىپ وتىر.