ونلاين اۋدارىمدارلى باقىلاۋ قالاي جۇزەگە اسادى?

كاسىپكەرلىكپەن اينالىساتىن ادامدارعا ءوزىنىڭ بيزنەس ەسەپشوتىن پايدالانۋعا كەڭەس بەرىلەدى. بۇل تۋرالى مەملەكەتتىك كىرىستەر كوميتەتى جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باس ساراپشىسى ەرسايىن كوپتىلەۋ ۇلى ايتتى, دەپ حابارلايدى qandastar.kz

«حالىقتىڭ كوپشىلىگى تەك Kaspi بانك اۋدارىمدارى باقىلاۋعا الىنادى دەپ ويلاۋى مۇمكىن. بىراق بۇل باقىلاۋ بارلىق ەكىنشى دەڭگەيلى بانكتەردەگى ءموبيلدى اۋدارىمدارعا قاتىستى بولماق. بىزدە ءموبيلدى اۋدارىمداردى باقىلاۋدا ارنايى بەلگىلەنگەن ولشەمشارت بار: ءبىر ايدا 100 نەمەسە ودان دا كوپ تۇلعادان ءۇش اي قاتارىنان ءموبيلدى اۋدارىم تۇسسە, وسى كىسىلەر سالىق ورگاندارىنىڭ نازارىنا ىلىنەدى. ماسەلەن, قاڭتار ايىندا 100 نەمەسە ودان دا كوپ تۇلعادان اۋدارىم ءتۇستى, اقپان ايىندا تاعى 100 ادامنان جانە ناۋرىز ايىندا 100 ءتۇرلى ادامنان اۋدارىم تۇسسە, مۇندا كاسىپكەرلىكتىڭ نىشانى بار دەگەن ءسوز», − دەدى ەرسايىن كوپتىلەۋ ۇلى اگەنتتىكتىڭ «Bizdin orta» پودكاستىندا.

بۇل رەتتە توي-ساداقا نەمەسە ەمگە اقشا جيناۋ دا ءموبيلدى اۋدارىم جولىمەن جۇرگىزىلەدى. ولار ارنايى حابارلاما الادى جانە ءوزىنىڭ كاسىپكەرلىكپەن اينالىسپايتىنى جونىندە تۇسىنىك بەرە الادى.

ەكىنشى دەڭگەيلى بانكتەر ءۇش اي قاتارىنان 100 ءتۇرلى ادامنان ءموبيلدى اۋدارىم العان ازاماتتار تۋرالى مالىمەتتى مەملەكەتتىك كىرىستەر كوميتەتىنە جىبەرىپ وتىرادى, تيىسىنشە كىرىستەر كوميتەتى كامەرالىق باقىلاۋ جۇرگىزىلەدى.

«ولار نەلىكتەن وسى ولشەمشارتتان اسىپ كەتكەنىن, قاي ۋاقىتتا ەمگە قاراجات جيناعانىن تۇسىندىرە الادى. مۇمكىن بولسا ونى دالەلدەيتىن قۇجاتتاردى كورسەتسە, ەش ماسەلە تۋىندامايدى, بۇل سالىقتاندىرۋعا جاتپايدى. ءبىز تەك قانا كاسىپكەرلىك كىرىستەردى انىقتاۋ ءۇشىن ءموبيلدى اۋدارىمداردى تەكسەرىپ جاتىرمىز. ال ەگەر شىن مانىندە كاسىپكەرلىكپەن اينالىسىپ, ءموبيلدى اۋدارىمدى قولدانىپ كەلسە, مىندەتتى تۇردە جەكە كاسىپكەر رەتىندە تىركەلۋى كەرەك, كاسىپكەرلىكتەن تاپقان كىرىسىن دەكلاراتسيالاپ, 10 پايىز كولەمىندە جەكە تابىس سالىعىن تولەيدى», – دەپ ءتۇسىندىردى ول.

بۇعان دەيىن ەرسايىن كوپتىلەۋ ۇلى موبيلدىك اۋدارىمدارعا قويىلاتىن شەكتەۋ ماسەلەسىن تۇسىندىرگەن ەدى.