Onlaın aýdarymdarly baqylaý qalaı júzege asady?

Kásipkerlikpen aınalysatyn adamdarǵa óziniń bıznes esepshotyn paıdalanýǵa keńes beriledi. Bul týraly Memlekettik kirister komıteti Jeke tulǵalardyń kiristerin ákimshilendirý basqarmasynyń bas sarapshysy Ersaıyn Kóptileýuly aıtty, dep habarlaıdy qandastar.kz

«Halyqtyń kópshiligi tek Kaspi bank aýdarymdary baqylaýǵa alynady dep oılaýy múmkin. Biraq bul baqylaý barlyq ekinshi deńgeıli bankterdegi mobıldi aýdarymdarǵa qatysty bolmaq. Bizde mobıldi aýdarymdardy baqylaýda arnaıy belgilengen ólshemshart bar: bir aıda 100 nemese odan da kóp tulǵadan úsh aı qatarynan mobıldi aýdarym tússe, osy kisiler salyq organdarynyń nazaryna ilinedi. Máselen, qańtar aıynda 100 nemese odan da kóp tulǵadan aýdarym tústi, aqpan aıynda taǵy 100 adamnan jáne naýryz aıynda 100 túrli adamnan aýdarym tússe, munda kásipkerliktiń nyshany bar degen sóz», − dedi Ersaıyn Kóptileýuly agenttiktiń «Bizdin orta» podkastynda.

Bul rette toı-sadaqa nemese emge aqsha jınaý da mobıldi aýdarym jolymen júrgiziledi. Olar arnaıy habarlama alady jáne óziniń kásipkerlikpen aınalyspaıtyny jóninde túsinik bere alady.

Ekinshi deńgeıli bankter úsh aı qatarynan 100 túrli adamnan mobıldi aýdarym alǵan azamattar týraly málimetti Memlekettik kirister komıtetine jiberip otyrady, tıisinshe kirister komıteti kameralyq baqylaý júrgiziledi.

«Olar nelikten osy ólshemsharttan asyp ketkenin, qaı ýaqytta emge qarajat jınaǵanyn túsindire alady. Múmkin bolsa ony dáleldeıtin qujattardy kórsetse, esh másele týyndamaıdy, bul salyqtandyrýǵa jatpaıdy. Biz tek qana kásipkerlik kiristerdi anyqtaý úshin mobıldi aýdarymdardy tekserip jatyrmyz. Al eger shyn máninde kásipkerlikpen aınalysyp, mobıldi aýdarymdy qoldanyp kelse, mindetti túrde jeke kásipker retinde tirkelýi kerek, kásipkerlikten tapqan kirisin deklaraııalap, 10 paıyz kóleminde jeke tabys salyǵyn tóleıdi», – dep túsindirdi ol.

Buǵan deıin Ersaıyn Kóptileýuly mobıldik aýdarymdarǵa qoıylatyn shekteý máselesin túsindirgen edi.