ونلاين رەجيمدەگى كاسسا اپاراتىن ورناتقان كاسىپكەرلەرگە سالىقتان جەڭىلدىك جاسالادى

پرەزيدەنت تاپسىرماسىنا سايكەس ەلىمىزدە ميكرو جانە شاعىن بيزنەس سالاسىنداعى كومپانيالار تابىسقا سالىناتىن سالىقتان ءۇش جىلعا دەيىنگى مەرزىمگە بوساتىلماق.

وتكەن جىلى شاعىن جانە ورتا بيزنەس سالاسى ەسەبىنەن ەل بيۋدجەتىنە تۇسكەن تابىس سالىعىنىڭ كولەمى 190 ميلليارد تەڭگەگە جەتكەن. سونىڭ ىشىندە 1,7 ميلليارد تەڭگە باتىس قازاقستان وبلىسىنىڭ ەنشىسىندە. مامانداردىڭ بولجامى بويىنشا كەلەر جىلى ايماقتا بۇل كورسەتكىشتىڭ كولەمى 1,9 ميلليارد تەڭگەگە ۇلعايۋى ءتيىس بولاتىن.

ميكرو جانە شاعىن بيزنەس نىساندارىن تابىس سالىعىنان بوساتۋ كىمگە ءتيىمدى? بۇدان بيۋدجەتتىڭ ءبۇيىرى ورتاياتىنى ءوز الدىنا, 3 جىلعا دەيىنگى مەرزىمگە تەكسەرىستەردىڭ توقتايتىنى دا ءبىراز سۇراقتىڭ تۋىنداۋىنا تۇرتكى دەيدى ساراپشىلار. بۇل رەتتە بيزنەستىڭ ادال ءارى زاڭعا سايكەس جۇرگىزىلۋىنەن بولەك تۇتىنۋشىلار الدىنداعى جاۋاپكەرشىلىگى دە جوعارىلاي ءتۇسۋى قاجەت. ياعني پرەزيدەنت اتاپ وتكەندەي, موراتوري كەزەڭىندە تەكسەرۋشى ورگانداردىڭ ورنىن قوعامدىق باقىلاۋ تەتىكتەرىن جانداندىرۋ ارقىلى تولتىرۋعا نەگىز ءبارى.
ايگۇل تۇركينا, قوعام قايراتكەرى:
– قازىرگى تاڭدا شاعىن بيزنەستىڭ الەۋمەتتىك سيپاتى باسىم. ءارى مەملەكەت بەلگىلى ءبىر سالىق تولەمدەرىنە قاتىستى وسىنداي شارالارعا بارۋى جەرگىلىكتى بيۋدجەت ءۇشىن ءتيىمدى ەمەستىگىن تۇسىنەمىز. ال ءوز ءىسىن ەندى عانا باستاعان ميكرو جانە شاعىن بيزنەس ءۇشىن بۇل وتە قولايلى جاعداي دەپ سانايمىن. پرەزيدەنت ءوز جولداۋىندا «بيزنەس وكىلدەرى سانيتارلىق-ەپيدەميولوگيالىق سالاداعى نورمالار مەن ەرەجەلەردى بۇزاتىن بولسا, ونداي كومپانيالار جابىلىپ, يەلەرى جاۋاپكەرشىلىككە تارتىلادى» دەپ اتاپ كورسەتتى.
وسى ارقىلى جاۋاپكەرشىلىكتى ارتتىرۋمەن قاتار شاعىن بيزنەسكە تۇسەتىن اۋىرتپالىق ازايتىلماق. كاسىپكەرلەر ءوز كەزەگىندە سالىق جۇيەسىندە بۇعان دەيىن قولعا الىنعان شارالاردىڭ ءوز جەمىسىن بەرگەنىن ايتادى.
نۇرتاس سالدىروۆ, كاسىپكەر:
– كاسىپكەرلەرگە ايىپپۇل مەن ءوسىمپۇلدى كەشىرىم جاساپ جاتىر, ول ۇلكەن كاسىپكەرلەرگە قولداۋ دەپ ويلايمىن. كوپ كەدەرگى كورىپ جاتقان جوقپىز, تەك قانا كاسىپكەلەردىڭ ءوز ساۋاتتىلىعىن كوتەرۋ قاجەت. ينتەرنەتپەن جۇمىس جاساۋ, ينتەرنەت ارقىلى تولەۋ دەگەن سياقتى, سونداي جاعىنان ۇيرەنسە سوندا ءوسىم ەشتەڭە بولماس ەدى. وزدەرىنىڭ ينتەرنەت ارقىى سالىقتارىن تەسەرىپ تۇرسا ۋاقىتىندا. شاعىن جانە ورتا بيزنەس سالاسى بويىنشا وڭىردە 52 مىڭداي سالىق تولەۋشى تىركەلگەن. سونىڭ ىشىندە سالىقتىق راقىمشىلىق جاسالاتىن شاعىن جانە ورتا بيزنەس نىساندارىنىڭ سانى 2 مىڭعا جۋىقتايدى. ولاردىڭ سالىق تۇرىندەگى بەرەجاعىنىڭ كولەمى 3 ميلليارد تەڭگەدەن اسادى. ال كەشىرىلەتىن ءوسىمپۇلداردىڭ جالپى سوماسى 1,5 ميلليارد تەڭگە. بۇل كاسىپكەرلەرگە ۇلكەن كومەك دەيدى ماماندار.
تيمۋر تولەپوۆ, وبلىستىق مەملەكەتتىك كىرىستەر دەپارتامەنتىنىڭ باسقارما باسشىسى:
– ياعني نەگىزگى بەرەجاقتارىن تولىقتاي تولەگەن جاعدايدا ءوسىمپۇلدار مەن ايىپپۇلدارى تولىقتاي شەگەرىلەدى. سونىمەن قاتار مىنا ونلاين رەجيمدە باقىلاۋ كاسسالىق اپپاراتتارىن ساتىپ الاتىن كاسىپكەرلەرىمىز وزدەرىنىڭ جەكە تابىس سالىعىنان 50 پايىزعا دەيىن جەڭىلدىك الادى.
ايتا كەتۋ كەرەك, مۇنداي راقىمشىلىق 700 ميلليون تەڭگە سالىقتىق بەرەشەگى بار 70 مىڭداي جەكە تۇلعاعا دا جاسالادى. بۇگىندە وڭىردە مىڭ جارىمنان اسا سالىق تولەۋشى بيۋدجەت الدىنداعى 41 ميلليون تەڭگە قارىزىن وتەسە, سونىڭ 17 ميلليونى اكتسيا اياسىندا كەشىرىلگەن.

اۆتورلارى: تالعات سەرىكقالي ۇلى, بولات جارىلعاسوۆ, قانات ماحمۇتوۆ

دەرەككوز: https://24.kz/kz/zha-aly-tar/ekonomika/item/341808-onlajn-rezhimdegi-kassa-aparatyn-ornat-an-k-sipkerlerge-saly-tan-zhe-ildik-zhasalady