Оңтүстік Корея президенті қызметінен кетті

Фото: qazaqstantv

Оңтүстік Корея президенті Юн Сок Ёльге жарияланған импичмент өз күшінде қалды, деп хабарлайды qandastar.kz

Yonhap агенттігі мәліметінше, бұл шешімді барлық сегіз судья қолдады. Олардың пікірінше, бұрынғы мемлекет басшысы ел Конституциясын қорғау міндетін орындай алмаған. Әсіресе, әскери жағдай туралы жарлықта парламент қызметіне тыйым салынуы азаматтардың негізгі құқықтарының бұзылуына әкелген.

Енді 60 күн ішінде елде кезектен тыс президенттік сайлау өтеді.

Былтыр желтоқсан айында Юн Сок Ёль елде әскери жағдай енгізген. Осыдан кейін әскерилер парламентті қоршап, ғимаратқа кіруді шектеді. Алайда бірнеше сағат ішінде Оңтүстік Корея депутаттары парламентке кіріп, әскери жағдайды жойды.

Осы оқиғалардан соң президентке импичмент жарияланып, оған қарсы қылмыстық іс қозғалды.