Jańalyqtar
Ońtústik Koreıanyń burynǵy birinshi hanymy elden keshirim surady
Foto: beıneden kadr
Ońtústik Koreıada tarıhta alǵash ret eks-birinshi hanym tergeýge alyndy. Ol sottalyp jatqan burynǵy prezıdent Iýn Sok Ioldiń áıeli, dep habarlaıdy qandastar.kz Orda.kz-ke silteme jasap.
Búgin, 6 tamyz kúni eks-prezıdent Iýn Sok Ioldiń áıeli Kım Gon Hı Seýl ortalyǵynda prokýrordyń jaýap alýyna keldi. Ol prokýrordyń keńsesine kirer aldynda jýrnalıster qoıǵan saýaldarǵa jaýap berdi. Sonymen qatar el aldyna shyǵyp kópshilikten keshirim surady.
«Men sııaqty adam búkil elde alańdaýshylyq týdyrǵanyna shyn júrekten ókinemin», – dedi ol.
Biraq eks-hanym ózine taǵylǵan aıyptar týraly suraqtarǵa jaýap berýden bas tartty. Kım Gon Hı birneshe qylmys boıynsha kúdikke ilingen. Burynǵy memleket basshysynyń áıeli alaıaqtyqtan bastap para alýǵa deıin baryp, óz qyzmetin teris paıdalanǵan degen aıyp taǵyldy. Al kúıeýi Iýn Sok Iol byltyr elde áskerı jaǵdaı engizgeni úshin túrmege toǵytylǵan.
Aıta keteıik, Iýn Sok Ioldiń soty áli jalǵasýda. Biraq eks-prezıdent jaýap alýǵa kelmeı, narazylyq tanytyp otyr.
