ورال اكىمى قىزمەتىنەن كەتتى

سۋرەت: ورال قالاسى اكىمدىگىنىڭ ءباسپاسوز قىزمەتى

ورال قالاسىنىڭ اكىمى مەيىرجان ساتقانوۆ قالا تۇرعىندارىنا ۇندەۋ جاريالادى. قالا باسشىسى اكىم قىزمەتىنەن كەتۋگە نەلىكتەن شەشىم قابىلداعانىن ءتۇسىندىردى, دەپ حابارلايدى Zakon.kz.

ساتقانوۆ مالىمدەمەسىن 2024 جىلدىڭ 22 شىلدەسىندە Instagram جەلىسىندەگى رەسمي پاراقشاسىندا جاريالادى.

«بۇگىن ورال قالاسىنىڭ اكىمى قىزمەتىنەن كەتكەنىمدى حابارلايمىن. مەن ءۇشىن بۇل قىزمەتتە ەكى جىلدان استام ورالدىقتارمەن قويان-قولتىق جۇمىس جاساۋ ۇلكەن مارتەبە بولعانىن ايتقىم كەلەدى. دەنساۋلىعىم سىر بەرىپ, قىزمەتتەن بۇدان بۇرىن كەتۋدى ويلاپ جۇرگەنمىن. الايدا كوكتەمدە قالامىزدا سۋ تاسقىنى ورىن الىپ, مۇنداي قيىن كەزەڭدە جۇمىستان شىعا المادىم. وسىلايشا ءوز مىندەتتەرىمدى ارىپتەستەرىممەن بىرگە جالعاستىرا بەردىم», – دەدى مەيىرجان ساتقانوۆ.

ساتقانوۆ ءسوزىن جالعاستىرا وتىرىپ, بۇگىندە بارلىق باعىتتار بويىنشا جۇمىس جولعا قويىلعانىن سەنىممەن ايتتى.

«ءبىز بارشا ورالدىقتارمەن بىرگە ۇلكەن جۇمىس جاسادىق دەپ ويلايمىن. تەك كوكتەمگى سۋ تاسقىنىمەن كۇرەسىپ, ونىڭ سالدارىمەن اينالىسقان كەزدە عانا ەمەس, سونىمەن بىرگە ەكى جىل بويى سۇيىكتى قالامىزدى ودان ءارى كوركەيتۋگە تىرىستىق. بۇل – تۋعان جەرىنە جاناشىر ءار ازاماتتىڭ ولشەۋسىز ەڭبەگى. قازىر بارلىق سالالاردا جۇمىس جولعا قويىلعان. جاڭادان تاعايىندالاتىن قالا اكىمى اعىمداعى جاعدايدى جەدەل ءتۇسىنىپ, جۇمىستى جۇيەلى جالعاستىراتىنىنا, ال بولاشاقتا شاھارىمىز ءۇشىن جاڭا جوبالارعا باستاماشى بولاتىنىنا سەنەمىن. ونىڭ ۇستىنە, ءسىز, مەنىڭ قىمباتتى جەرلەستەرىم, وڭ باستامالاردى ءاردايىم قولداۋعا دايىنسىزدار. ارىپتەستەرىمە جانە قۇرمەتتى ورالدىقتارعا سەنىم بىلدىرگەنىڭىز ءۇشىن العىس ايتامىن», – دەدى مەيىرجان ساتقانوۆ

ساتقانوۆ اكىم بولىپ 2022 جىلدىڭ 26 ساۋىرىندە تاعايىندالدى.

2024 جىلدىڭ مامىر ايىندا قازنەتتە اكىمنىڭ ءوز ەركىمەن وتستاۆكاعا كەتكەنى تۋرالى اقپارات پايدا بولدى. الايدا ءباسپاسوز حاتشىسى دانيار وسپان بۇل دەرەكتەردىڭ شىندىققا جاناسپايتىنىن ايتتى.