Oral ákimi qyzmetinen ketti

Sýret: Oral qalasy ákimdiginiń baspasóz qyzmeti

Oral qalasynyń ákimi Meıirjan Satqanov qala turǵyndaryna úndeý jarııalady. Qala basshysy ákim qyzmetinen ketýge nelikten sheshim qabyldaǵanyn túsindirdi, dep habarlaıdy Zakon.kz.

Satqanov málimdemesin 2024 jyldyń 22 shildesinde Instagram jelisindegi resmı paraqshasynda jarııalady.

«Búgin Oral qalasynyń ákimi qyzmetinen ketkenimdi habarlaımyn. Men úshin bul qyzmette eki jyldan astam oraldyqtarmen qoıan-qoltyq jumys jasaý úlken mártebe bolǵanyn aıtqym keledi. Densaýlyǵym syr berip, qyzmetten budan buryn ketýdi oılap júrgenmin. Alaıda kóktemde qalamyzda sý tasqyny oryn alyp, mundaı qıyn kezeńde jumystan shyǵa almadym. Osylaısha óz mindetterimdi áriptesterimmen birge jalǵastyra berdim», – dedi Meıirjan Satqanov.

Satqanov sózin jalǵastyra otyryp, búginde barlyq baǵyttar boıynsha jumys jolǵa qoıylǵanyn senimmen aıtty.

«Biz barsha oraldyqtarmen birge úlken jumys jasadyq dep oılaımyn. Tek kóktemgi sý tasqynymen kúresip, onyń saldarymen aınalysqan kezde ǵana emes, sonymen birge eki jyl boıy súıikti qalamyzdy odan ári kórkeıtýge tyrystyq. Bul – týǵan jerine janashyr ár azamattyń ólsheýsiz eńbegi. Qazir barlyq salalarda jumys jolǵa qoıylǵan. Jańadan taǵaıyndalatyn qala ákimi aǵymdaǵy jaǵdaıdy jedel túsinip, jumysty júıeli jalǵastyratynyna, al bolashaqta shaharymyz úshin jańa jobalarǵa bastamashy bolatynyna senemin. Onyń ústine, siz, meniń qymbatty jerlesterim, oń bastamalardy árdaıym qoldaýǵa daıynsyzdar. Áriptesterime jáne qurmetti oraldyqtarǵa senim bildirgenińiz úshin alǵys aıtamyn», – dedi Meıirjan Satqanov

Satqanov ákim bolyp 2022 jyldyń 26 sáýirinde taǵaıyndaldy.

2024 jyldyń mamyr aıynda Qaznette ákimniń óz erkimen otstavkaǵa ketkeni týraly aqparat paıda boldy. Alaıda baspasóz hatshysy Danııar Ospan bul derekterdiń shyndyqqa janaspaıtynyn aıtty.