ورالدا «JasQZ» جوباسى قورىتىندىلاندى

باتىس قازاقستان وبلىسىندا قازاقستان جاستارىن الەۋمەتتەندىرۋگە باعىتتالعان «JasQZ» جوباسى قورىتىندىلاندى. جوبانى «ازاماتتىق باستامالاردى قولداۋ ورتالىعى» مەن قازاقستان رەسپۋبليكاسى قوعامدىق دامۋ مينيسترلىگىنىڭ قولداۋىمەن «ادىرنا» ۇلتتىق-ەتنوگرافيالىق بىرلەستىگى جۇزەگە اسىردى.

– باتىس قازاقستان وبلىسىنىڭ 12 اۋدانى مەن ورال قالاسىن تۇگەل قامتىعان بۇل پيلوتتىق جوبا ەلىمىز بويىنشا تۇڭعىش رەت وتكىزىلىپ وتىر, – دەيدى «ادىرنا» ۇلتتىق-ەتنوگرافيالىق بىرلەستىگىنىڭ توراعاسى ارمان اۋباكىر. ۇيىمداستىرۋشىلاردىڭ ايتۋىنشا, جاستاردى الەۋمەتتەندىرۋگە, ياعني قوعامدىق ءومىردىڭ ءتۇرلى سالاسىنا بەيىمدەندىرۋگە, قابىلەت قىرىن اشۋعا باعىتتالعان جوبانىڭ دايىندىق جۇمىستارى قىركۇيەك ايىندا باستالعان ەكەن. وتكەن ءۇش ايعا جۋىق ۋاقىت ىشىندە جوباعا قاتىسۋشىلار سانى التىڭ مىڭ ادامعا جۋىق. قازان ايىندا جوبا جەتەكشىلەرى باتىس قازاقستان وبلىسىنىڭ بۇكىل اۋدانىن ارالاپ, مۇعالىمدەرگە سەمينار وتكىزىپ, سەرتيفيكات بەرىلگەن. «JasQZ» جوباسى اياسىندا ۇيىمداستىرىلعان «مەنىڭ تاڭداۋىم» بايقاۋى 6 باعىتتان تۇردى. وعان باتىس قازاقستان وبلىسىنىڭ 9-11 سىنىپ وقۋشىلارى مەن جوعارى وقۋ ورنى ستۋدەنتتەرى قاتىسىپ, ءوزارا باسەكەگە ءتۇستى. مەكتەپ وقۋشىلارى مەن ستۋدەنتتەر «ۇلتتىق قۇندىلىق», «اسكەري-پاتريوتتىق», «الەۋمەتتىك بەلسەندىلىك», «زياتكەرلىك», «شىعارماشىلىق», «سپورتتىق» باعىتتارى بويىنشا جارىسىپ, جۇزدەن جۇيرىك شىققاندار قورىتىندى سايىستا باق سىناۋ ءۇشىن ورال قالاسىنا جينالدى. تارتىستى وتكەن فينالدىق سايىستا «ۇلتتىق قۇندىلىق» باعىتى بويىنشا ۇزدىكتەر سالت-ءداستۇر بويىنشا بىلىكتىلىگىن سىنادى. جەڭىمپاز اۋىزشا سۇراقتارعا جاۋاپ بەرۋ ارقىلى انىقتالدى. قازىلار شەشىمىمەن «جاس ەتنوگراف» اتالىمى اقجايىق اۋدانى, ەسەنساي مەكتەبىنىڭ وقۋشىسى گۇلناز عادىلجانوۆاعا جانە جاھانشا دوسمۇحامەدوۆ اتىنداعى پەداگوگيكالىق كوللەدج ستۋدەنتى ءبيبىنۇر شارىپوۆاعا بۇيىردى. «اسكەري-پاتريوتتىق» باعىت بويىنشا ۇزدىكتەر «مەملەكەتتىڭ قورعانىس قابىلەتى قايتسە بەكەم بولادى?» دەگەن تاقىرىپتا ەسسە جازىپ جارىستى. قازىلار اسكەري-پاتريوتتىق «جاس ۇلان» اتالىمىنا ورال قالاسىنداعى №36 مەكتەپ وقۋشىسى ديلناز ماحۋتوۆا مەن جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ ستۋدەنتى رايىمجان سانسىزباەۆتى لايىق دەپ تاپتى. «زياتكەرلىك» باعىت بويىنشا ۇزدىكتەر ماتەماتيكا ءپانى بويىنشا سىناقتان ءوتتى. بەلگىلى ماتەماتيك ەلدوس سافۋللين باستاعان قازىلار شەشىمىمەن ورال قالاسىنىڭ №43 مەكتەپ وقۋشىسى سانجار جۇماسەيىتوۆ جانە م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ستۋدەنتى سانجار لاتيفوۆ ەڭ ۇزدىك اتاندى. «شىعارماشىلىق» باعىت بويىنشا ۇزدىكتەر ۇلتتىق اسپاپتاردا ونەر كورسەتۋ ارقىلى انىقتالدى. بۇل سايىىستا «ۇزدىك ونەرپاز» اتالىمىن ورال قالاسىنداعى №46 مەكتەپ وقۋشىسى ءمادينا قادىرعاليەۆا مەن جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ ستۋدەنتى التىن جۇماعاليەۆا جەڭىپ الدى. «الەۋمەتتىك بەلسەندىلىك» باعىتى بويىنشا ۇزدىكتەر قوعامنىڭ دامۋىنا تەگىن ەڭبەك ەتكەنىن دالەلدەيتىن قۇجاتتارىن (ديپلوم, العىس حات, فوتو-ۆيدەو ايعاقتار ج.ت.ب.) ۇسىنۋ ارقىلى انىقتالدى. وسىلايشا قازىلار «ۇزدىك ەرىكتى» اتالىمىمەن اقجايىق اۋدانى, بىتىك مەكتەپ-بالاباقشا كەشەنىنىڭ وقۋشىسى گۇلايناز سارسەنعازيەۆانى جانە ورال مۇناي, گاز جانە سالالىق تەحنولوگيالار كوللەدجىنىڭ ستۋدەنتى ارگەن عۇباشەۆتى ماراپاتتادى. «سپورتتىق» باعىت بويىنشا ۇزدىكتەر قاشىقتىققا جۇگىرۋ, كەرمەگە (تۋرنيك) تارتىلۋ جارىستارى ارقىلى انىقتالدى. قازىلار شەشىمىمەن ورال قالاسىنىڭ №6 مەكتەپ وقۋشىسى نۇرجان وتەپقاليەۆ پەن باتىس قازاقستان گۋمانيتارلىق اكادەمياسىنىڭ ستۋدەنتى نۇرلىحان بەكەجان «ۇزدىك سپورتشى» اتالىمىمەن ماراپاتتالدى. «JasQZ» جوباسى اياسىندا ۇيىمداستىرىلعان «مەنىڭ تاڭداۋىم» بايقاۋىنىڭ جەڭىمپازدارىن بەلگىلى قوعام قايراتكەرلەرى ءامىرجان قوسانوۆ پەن راسۋل جۇمالى تابىستادى. سالتاناتتى شارا بارىسىندا وسى شارانىڭ جۇزەگە اسىرۋعا بەلسەندى ات سالىسقان مامان, قىزمەتكەرلەر دە ماراپاتالدى. «JasQZ» جوباسىنىڭ قورىتىندى شاراسىنا «ازاماتتىق باستامالاردى قولداۋ ورتالىعى» باسقارما توراعاسىنىڭ ورىنباسارى گۇلنار ورالوۆا ارنايى كەلىپ قاتىسىپ, قۇتتىقتاۋ ءسوز سويلەدى. گۇلنار الىمجانقىزى ءوز سوزىندە بايقاۋدىڭ جوعارى دارەجەدە ۇيىمداستىرىلعانىن, باتىسقازاقستاندىق جاستاردىڭ وعان بەلسەنە قاتىسقانىن اتاپ ءوتتى. ايتا كەتۋ كەرەك, «ادىرنا» ۇلتتىق-ەتنوگرافيالىق بىرلەستىگى «JasQZ» جوباسى اياسىندا باتىس قازاقستان وبلىسى سىرىم اۋدانىنداعى الاش مۋزەيى مەن الاش اللەياسىندا جەرگىلىكتى وقۋشىلارمەن ەكسپەديتسيا ۇيىمداستىردى. مۋزەيدە بالالار الاش ارىستارىنىڭ شىعارمالارىن جاتقا وقىپ, ءوز ونەرىن ورتاعا سالدى. – جۇرەگى قازاق دەپ سوعاتىن جالىندى جاستاردىڭ ءوسىپ كەلە جاتقانى ءبىزدى وتە قاتتى قۋانتادى. ءبىز ورال قالالىق مەكتەپ وقۋشىلارى ءۇشىن «اتامەكەن» ويىن-ساۋىق ورتالىعىندا, «سايات» ەتنو-تۋريستىك ورتالىعىندا ەكسكۋرسيالار ۇيىمداستىردىق. ول جەردە قالانىڭ ۇزدىك شىققان جاستارىن سالتاناتتى تۇردە ماراپاتتاپ, ولاردىڭ اراسىندا دا ارقان تارتۋ, اسىق ويناۋ, قول كۇرەستىرۋ ءتارىزدى ۇلتتىق ويىنداردان جارىس ءوتتى. جەڭىمپازدار قولونەرشىلەر جاساعان ۇلتتىق بۇيىمداردى سىيعا الىپ, اتقا ءمىنىپ, ەرەكشە قۋاندى, – دەيدى وسى جوبانى ۇيىمداستىرۋشىلاردىڭ ءبىرى نۇرلان ءسادىر. ءۇش ايعا سوزىلعان جوبانىڭ ۇزدىك شىققان جەڭىمپازدارىنا ارنايى تىكتىرىلگەن كۇرتەشە, كۋالىك, توسبەلگىلەر تاراتىلدى. مادەنيەتتانۋشى, بەلگىلى ەتنوگراف بەردالى وسپاننىڭ «قازاق سالتتارىنىڭ ءىنجۋ-مارجاندارى» اتتى كىتابى دا سىيعا تارتىلدى. – «JasQZ» – جاستار بويىنداعى جاقسى قابىلەتتەردى اشىپ, پاتريوتتىق سەزىمدى وياتاتىن, بوس ۋاقىتتى ءتيىمدى پايدالانۋعا باعىتتايتىن, ولاردى تۇلعا رەتىندە قالىپتاستىراتىن وتە قاجەتتى الەۋمەتتىك جوبا. مۇنداي سايىستار ەلدىك مۇددە تۇرعىسىنان ودان ءارى جالعاسىن تابۋى كەرەك دەپ ەسەپتەيمىز, – دەيدى جوبا جەتەكشىسى, «ادىرنا» ۇلتتىق-ەتنوگرافيالىق بىرلەستىگىنىڭ توراعاسى ارمان اۋباكىر. قازبەك قۇتتىمۇرات ۇلى, «ەگەمەن قازاقستان»

تولىق سىلتەمە: https://egemen.kz/article/178434-oralda-jasqz-zhobasy-qorytyndylandy