ورالدا كولىك ۇرلاپ پوليتسيادان قاشقان جۇرگىزۋشى ءبىر ادامنىڭ ولىمىنە سوبەپكەر بولدى

ورال قالاسىنىڭ تۇرعىنى اق ءتۇستى Renault Logan اۆتوكولىگىن ۇرلاپ ايداپ كەتكەن, دەپ حابارلايدى Qandastar.kz

بقو پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەنىندەي, وقيعا 1 قىركۇيەك كۇنى بولدى.

كۇدىكتى جول قوزعالىسى ەرەجەلەرىن ورەسكەل بۇزىپ, جولداعى باسقا قاتىسۋشىلارعا قاۋىپ ءتوندىرىپ, پوليتسيا قىزمەتكەرلەرىنىڭ توقتاۋ تۋرالى زاڭدى تالابىنا باعىنباعان.

نازارباەۆ كوشەسىنىڭ بويىندا باعدارشامنىڭ تىيىم سالاتىن بەلگىسىن ەلەمەي, نازارباەۆ پەن كارەۆ كوشەلەرىنىڭ قيىلىسىندا Lada Granta جانە Lada Largus اۆتوكولىكتەرىمەن سوقتىعىسقان.

وسى جول-كولىك وقيعاسى سالدارىنان Lada Granta اۆتوكولىگىنىڭ جۇرگىزۋشىسى اۋىر جاراقات الىپ, اۋرۋحانادا قايتىس بولدى.

— كۇدىكتى دە دەنە جاراقاتتارىن الىپ, مەديتسينالىق مەكەمەگە جەتكىزىلدى, قازىر ونى پوليتسيا كۇزەتىپ وتىر. اتالعان دەرەك بويىنشا قىلمىستىق ءىس قوزعالدى. قازىرگى ۋاقىتتا وقيعانىڭ بارلىق ءمان-جايىن انىقتاۋ ماقساتىندا تەرگەۋ امالدارى جۇرگىزىلىپ جاتىر, — دەپ حابارلادى ۆەدومستۆودان.

تۇرعىنداردىڭ سوزىنە قاراعاندا, مارقۇمنىڭ سوڭىندا ايەلى, ەكى بالاسى قالدى.