ورالدا وقۋشى قىزدى سىنىپتاستارى ۇرعان

فوتو: اشىق دەرەككوز

ورال قالاسىندا تۇراتىن ايەل قىزىن سىنىپتاستارى ۇرىپ-سوققانى جونىندە مالىمدەدى, دەپ جازدى qandastar.kz

«ول 5-سىنىپتا وقيدى. ءوزى ايتپاعان سوڭ جاعدايىن كورىپ, ونىڭ نومىرىنەن سىنىپتاستارىنان مەكتەپتە نە بولعانىن سۇراپ ەدىم. سىنىپتاستارىنىڭ جازعانىن كورىپ, شوشىدىم. سىنىپتاستارىنىڭ ۇشەۋى ۇرىپ, ەكەۋى تەلەفونىن تارتىپ الىپ, ءبىر-بىرىنە لاقتىرىپ تۇرىپتى, جەرگە دە تۇسىرگەن. ءبىر سىنىپتاسى ديرەكتورىنىڭ ورىنباسارىن شاقىرعان. جاعدايدى انىقتاۋ بارىسىندا سىنىپتاستارى وعان ارتىق سالماعى جانە كوزىلدىرىك تاققانى ءۇشىن بۋللينگ جاسالاتىنىن ايتتى», دەپ جازادى ايەل.

ونىڭ مالىمدەۋىنشە, سول كۇنى ۇرىپ-سوققان جەرىن جاراقات پۋنكتىندە تۇسىرگەن. قىزىنىڭ ميى شايقالىپ, باسى, قولى مەن جامباسىنىڭ ەتى كوگەرگەن.

اناسىنىڭ سوزىنە قاراعاندا, قازىرگى كەزدە قىزىندا جاراقاتتان كەيىن ەنتسەفالوپاتيا جانە يشەميالىق وپتيكوپاتيا (كوز كورۋىنىڭ ناشارلاۋى) پايدا بولعان. بۇدان كەيىن تاعى دا شاعىم تۇسىرگەن سوڭ قىزىن سوت-مەديتسينالىق ساراپتاماعا جىبەرگەن.

«قىزىمنىڭ كوڭىل-كۇيى جوق, باسى اۋىرىپ, قۇسقىسى كەلەدى. اتا-انالار مەن مەكتەپتىڭ ۇستىنەن سوتقا شاعىم بەرگىم كەلەدى. قىزىم ءوزىن كەلەمەج جاسايتىن بولعان سوڭ ايتپاعان. مۇنىڭ ءبارى مەكتەپ قابىرعاسىندا بولعان. نە مەكتەپ, نە اتا-انا, ەسەپكە قويعانى بولماسا, جاۋاپقا تارتىلعان جوق. ەگەر ساۋ بالا جاراقات السا, زارداپتارى مۇنداي بولماس ەدى. ال ونىڭ كوزىنە اسەر ەتتى, مۇگەدەكتىككە بەرىپ جاتىرمىز», دەيدى ايەل.

بقو پوليتسيا دەپارتامەنتى ءباسپاسوز قىزمەتىنىڭ ناقتىلاۋىنشا, ورال قالاسى تۇرعىنىنىڭ ءوتىنىشى بويىنشا شاعان پوليتسيا ءبولىمى ماتەريال جيناقتاعان. سوسىن ونى قاراۋ ءۇشىن ورال قالاسى اكىمدىگىنىڭ جانىنداعى كامەلەتكە تولماعاندار ىستەرى جونىندەگى كوميسسياعا جولداعان.

«اتالمىش وقيعا كوميسسيا توراعاسى, ورال قالاسى اكىمىنىڭ ورىنباسارى اسلان تاپيشەۆتىڭ, وقۋشىلار مەن ولاردىڭ زاڭدى وكىلدەرى, پسيحولوگتار مەن پەداگوگتەردىڭ قاتىسۋىمەن قارالدى. كوميسسيا شەشىمى بويىنشا وقۋشىلاردىڭ اتا-انالارىنا بالالارىن تاربيەلەۋ تۋرالى ەسكەرتۋ جاسالدى. سونداي-اق ءتارتىپ بۇزعان وقۋشىلار وقيتىن مەكتەپتىڭ اتىنا, پوليتسيا جانە ءبىلىم بەرۋ بولىمىنە وسىعان ۇقساس جاعدايلاردى قايتالاماۋ ماقساتىندا ۇسىنىستار بەرىلدى. مەكتەپكە كامەلەتكە تولماعاندار ىستەرى جونىندەگى ۋچاسكەلىك پوليتسيا ينسپەكتورى بەكىتىلگەنىن حابارلايمىز. سونىمەن قاتار بەينەباقىلاۋ كامەرالارى ورناتىلعان. وقۋشىلار اراسىنداعى قۇقىق بۇزۋشىلىقتاردىڭ الدىن الۋ بويىنشا جۇمىستار ۇدايى جۇرگىزىلۋدە», دەپ حابارلادى ۆەدومستۆودان.