Oralman kýáliginiń ýaqyty ótip ketse…

Qazaqstan Respýblıkasynyń zańyna sáıkes Oralman mártebesi ıaǵnı oralman kýáligi bir ret qana beriledi. Eger kýáliktiń ýaqyty ótip ketken jaǵdaıda alty aıdyń ishinde taǵy 3 aıǵa ǵana uzartýǵa bolady. Al, bul múmkindikti jiberip alsańyz, onda sizdiń oralman kýáligińiz múldem uzartylmaıdy. Endi oralman kýáliktiń ýaqyty ótip, uzartý múmkindigi bolmaı qalǵan qandastar qaıtpek kerek?

Eger oralman kýáligi bolmasa, QR azamattyǵyn alýǵa qujat tapsyra almaıdy. Mine bul kóshi-qon zańynyń qandastar arasynda qıyndyq týydyryp otyrǵan kedergilerdiń biri. Sebebi, keıbir oralman baýyrlarymyz yqtııar hat pen oralman kýálikke qujatty bir mezgilde tapsyrady eken. Nátıjesinde, oralman kýálik tez shyǵyp, yqtııar haty daıyn bolǵansha jyl ótip ketken jaǵdaılar óte kóp. Saldarynan oralman kýáliktiń ýaqyty ótip, Qazaqstan Respýblıkasynyń azamattyǵyn alýǵa qujat tapsyra almaı qınalyp jatady. Budan bólek, Qytaıdan kelgen qandastarymyz Qytaıdan Qazaqstanǵa shyǵarda vıza ýaqytynan tys, jergilikti úkimetke «eki-úsh aı merzimde qaıtyp kelemiz» — dep, qolhat jazyp qaldyrady eken. Eger sol úsh aı merzimde qaıtpaǵan jaǵdaıda sol jaqta qalǵan týystaryn qamaýǵa alady. Osy kelisim hattyń kesirinen Qazaqstanǵa kelip, yqtııar hat pen oralman kýálikke qujat tapsyryp qaıtyp ketýge májbúr bolatyndary qanshama? Alaıda Qytaı úkimeti qaıtyp barǵan qandastarymyzdyń qujattaryn jınap alyp, eki-úsh jyl Qazaqstanǵa shyǵarmaıdy. Osy aralyqta álgi Qazaq elinde jınap ketken qujattary daıyn bolyp qana qoımaı, ýaqyty ótip ketetin kórinedi. Budan tys, qandastardyń ózderi de qujat máselesine salǵyrt bolsa kerek. Oǵan krıllıaǵa saýatsyzdyǵyn qosyńyz. Aradaǵy deldaldardyń «qyzmeti» taǵy bar. Dál osyndaı kóptegen kedergilikter aqyr aıaǵynda qujattarynyń ýaqyty ótip ketýge ákelip tireledi eken.

Biz bul máseleni qandastarmen tikeleı aralsý, jınalystar ótkizý barysynda anyqtadyq. Tipti búgingi tańda «Adyrna» birlestiginiń atyna kelip túsken ótinish hattarda esep joq. Oǵan túrtki bolǵan Almaty qalasy Ishki saıasat basqarmasynyń tikeleı qoldaýymen qolǵa alynyp otyrǵan «Otan ottan da ystyq» jobasy. Joba bastalǵaly beri oralman kýáliktiń «jyrymen» hat jazyp, jedel jelige qońyraý shalǵandar qanshama? Endigi maqsat «osy oralman mártebesi kerek pe?» — degen túıtkildi saýalǵa jaýap izdeý. Sol arqyly elimiz azamattyǵyn ala almaı júrgen kóptegen qandasymyzdyń máselesine jurt nazaryn aýdartý bolmaq.