ورالمان مارتەبەسى ۇزارتىلادى

الماتى قالاسى مەملەكەتتىك ەڭبەك ينسپەكتسياسى جانە كوشى-قون باسقارماسىنىڭ كوشى-قون ءبولىمى قالا تۇرعىندارىنا مىنا جاعدايدى حابارلايدى: ەلباسى 2018 جىلدىڭ 16 ساۋىرىندە قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوشى-قونى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى قازاقستان رەسپۋبليكاسىنىڭ زاڭىنا قول قويدى. زاڭ 28 ساۋىردە رەسمي اقپارات قۇرالدارىندا جاريالانىپ, قولدانىسقا ەنگىزىلدى.
اتالعان زاڭعا سايكەس, حالىقتىڭ كوشى-قونى تۋرالى قازاقستان رەسپۋبليكاسىنىڭ 2011 جىلعى 22 شىلدەدەگى №477-IV زاڭىنىڭ بىرنەشە باپتارىنا وزگەرىس ەنگىزىلدى. سونىڭ ىشىندە21-باپقا وزگەرتۋلەر مەن تولىقتىرۋلار ەنگىزدى. بۇل باپ ورالمان كۋالىگىنىڭ قولدانىس مەرزىمى توقتاتىلعان ورالماندار ءۇشىن تاعى ءبىر مۇمكىندىك بەرىلگەن قۋانىشتى جاعداي بولىپ وتىر.
21-باپتىڭ 2-تارماعىندا «جەرگىلىكتى اتقارۋشى ورگان ءوتىنىش بەرىلگەن كۇننەن باستاپ بەس جۇمىس كۇنى ىشىندە ەتنيكالىق قازاقتارعا جانە ولاردىڭ وتباسى مۇشەلەرىنە ورالمان مارتەبەسىن بەرەدى, نەمەسە ۇزارتادى, نەمەسە بەرۋدەن نەمەسە ۇزارتۋدان ءۋاجدى تۇردە باس تارتادى.» – دەپ كورسەتىلگەن. ياعني, ورالمان كۋالىگىن الىپ, ءبىر جىلدىڭ ىشىندە جەڭىلدەتىلگەن تارتىپپەن ازاماتتىققا قۇجاتتارىن وتكىزە الماعان ورالماندار, كۋالىكتىڭ قولدانىس مەرزىمى توقتاتىلعان كەزدەن باستاپ التى اي ىشىندە ۇزارتۋعا ءوتىنىش بەرە الادى.
قازاقستان رەسپۋبليكاسىنىڭ ازاماتتىعىن وڭايلاتىلعان (تىركەۋ) تارتىپپەن الۋ ماقساتىندا قازاقستان رەسپۋبليكاسىنىڭ اۋماعىندا تۇراقتى تۇراتىن ەتنيكالىق قازاقتار ورالمان مارتەبەسى توقتاتىلعان كۇننەن باستاپ التى اي وتپەگەن ورالمان مارتەبەسىن ۇزارتۋ تۋرالى شەشىمدى جەرگىلىكتى اتقارۋشى ورگان ءۇش ايدان اسپايتىن مەرزىمگە ءبىر رەت قابىلدايدى. ۇزارتۋعا ءوتىنىشتى مەملەكەتتىك ورگان نەمەسە حالىققا قىزمەت كورسەتۋ ورتالىعى ارقىلى بەرۋگە بولادى.
الماتى قالاسىندا تۇراقتى تىركەۋدە تۇراتىن ورالماندار ۇزارتۋعا ءوتىنىشتى تولە بي كوشەسى ء155ۇي مەكەنجايىندا ورنالاسقان الماتى قالاسى مەملەكەتتىك ەڭبەك ينسپەكتسياسى جانە كوشى-قون باسقارماسىنا, نەمەسە حالىققا قىزمەت كورسەتۋ ورتالىعى ارقىلى ءوتىنىش بىلدىرە الادى.

ك.گاليەۆا,
الماتى قالاسى مەملەكەتتىك ەڭبەك
ينسپەكتسياسى جانە كوشى-قون
باسقارماسى كوشى-قون
ءبولىمىنىڭ باسشىسى.