Oralmandardyń eńbek ótili qalaı esepteledi

ASTANA. QazAqparat habarlaıdy.

Qytaı Halyq Respýblıkasy eńbek ótilin ózara tanýǵa qatysty kelisimdi rásimdeýge kelispeı otyr. Soǵan qaramastan, Qazaqstan atalǵan memleketten keletin qandastyrmyzdyń eńbek ótilin birjaqty tártippen esepteýge ázir, dep habarlaıdy QazAqparat tilshisi. QR Eńbek jáne halyqty áleýmettik qorǵaý mınıstri Mádına Ábilqasymovanyń aıtýynsha, búginde Qytaı sııaqty elderden keletin qandastarymyz ózderiniń eńbek ótilin dáleldeı almaı júredi. Sebebi atalǵan memlekette eńbek ótilin rásimdeýdiń biryńǵaı júıesi joq, tipti eńbek kitapshasy da júrgizilmeıdi. Al eńbek ótilin dáleldeı almaǵannan keıin zeınetaqynyń tolyq mólsherin alý qıyn. «Negizi, ondaı máseleler ekijaqty halyqaralyq kelisimdermen retteledi. Ondaıdy «eńbek ótilin ózara taný» dep ataıdy. Qazaqstan birqatar memlekettermen osy ispetti kelisimderdi rásimdegen. Biz Qytaıǵa da eńbek ótilin ózara tanýdy usyndyq. Bylaısha aıtqanda, biz shetelden keletin qandastyrmyzdyń eńbek ótilin tolyǵymen sanaımyz. Olar da sóıtedi. Degenmen, Qytaı jaq oǵan kelisemiz degen nıetin bildirgen joq. Sol sebepti biz ózimiz eńbek ótilin birjaqty tanýǵa daıynbyz. Sebebi qandastarymyzdyń biraz bóligi sol jaqtan kelip jatady», – dedi M.Ábilqasymova QazAqparat tilshisine. Onyń sózine qaraǵanda, endigi másele – eńbek ótilin dáleldeıtin qujattardy anyqtaý. Ol eńbek kitapshasy bola ma, jumys berýshiniń resmı haty bola ma, osy jaǵyn rettep alý qajet. «Qazirgi kezde arnaıy sarapshylar toby Qytaı men Mońǵolııa boıynsha jumys istep jatyr. Sebebi atalǵan eki memlekettegi jaǵdaı uqsas. Sarapshylar eńbek ótilin dáleldeýdiń formalaryn pysyqtap jatyr. Aldaǵy ýaqytta tıisti zańnamaǵa oralmandardyń eńbek ótilin esepteýge qatysty ózgerister engiziledi», – dep atap kórsetti M.Ábilqasymova. Aıta keteıik, buǵan deıin mınıstr M.Ábilqasymova oralmandardyń eńbek ótilin esepteýge qatysty arnaıy hatty Qytaıǵa jibergeni jaıynda aıtqan bolatyn. Onyń aıtýynsha, oralmandardyń eńbek ótilin esepteý máselesi sheshilse, bazalyq zeınetaqy jáne taǵy basqa áleýmettik tólemderdiń ulǵaıǵan mólsherin alýǵa múmkindik bolady. «Oralmandardyń kóbisi Mońǵolııadan, Qytaıdan, О́zbekstannan, Reseıden, tipti Germanııadan kelip jatyr», – deıdi M.Ábilqasymova.

Maqala boıynsha silteme: https://www.inform.kz/kz/oralmandardyn-enbek-otilin-esepteu-maselesi-kalay-sheshiledi_a3353480