«ورداباسى» فك-نىڭ بۇرىنعى پرەزيدەنتىنە قاتىستى ءىس قوزعالدى

«ورداباسى» فك-نىڭ بۇرىنعى پرەزيدەنتىنە قاتىستى قىلمىستىق ءىس قوزعالدى, دەپ حابارلايدى qandastar.kz

«ورداباسى» فك بۇرىنعى پرەزيدەنتىنە قاتىستى قىلمىستىق ءىستى سىبايلاس جەمقورلىققا قارسى قىزمەت جۇرگىزىپ جاتىر. بۇل تۋرالى شىمكەنت قالالىق سپورت باسقارماسىنىڭ باسشىسى مىقتىبەكوۆتىڭ رەسمي ساۋالىنا بەرگەن جاۋابىندا بەلگىلى بولدى.

بۇل لاۋازىمدى 2022 جىلعى اقپاننان 2024 جىلعى مامىرعا دەيىن باۋىرجان ابدۋبايتوۆ اتقارعانى بەلگىلى.

سونىمەن قاتار, شىمكەنت پروكۋراتۋراسى 2024 جىلعى جەلتوقساننان باستاپ 2020-2024 جىلدار ارالىعىنداعى بيۋدجەت قاراجاتىنىڭ تيىمدىلىگى مەن ماقساتتى جۇمسالۋىن تەكسەرىپ جاتىر. بۇگىن قازاقستان رەسپۋبليكاسىنىڭ باس پروكۋراتۋراسى فۋتبول فەدەراتسياسىنىڭ بۇرىنعى باسشىلارىنا قاتىستى قىلمىستىق ىستەردى قارجىلىق مونيتورينگ اگەنتتىگىنە تاپسىرعانىن مالىمدەدى.

بۇل تەكسەرۋلەر «اقتوبە», «جەتىسۋ» جانە «ورداباسى» فۋتبول كلۋبتارىندا جۇرگىزىلدى. اتالعان كلۋبتاردا كەلىسىمشارت سومالارىنىڭ ارتتىرىلعانى, ويىنشىلاردىڭ تومەن باعامەن ساتىلىپ, جوعارى باعامەن ساتىپ الىنعانى انىقتالدى. سونىمەن قاتار قارجىلىق جىمقىرۋلار دا انىقتالدى.

قازاقستان فۋتبول فەدەراتسياسىنىڭ رەسمي سايتىندا «شىمكەنت قالاسى فۋتبول فەدەراتسياسى» زاڭدى تۇلعالار اسسوتسياتسياسىنىڭ پرەزيدەنتى رەتىندە ابدۋبايتوۆ المات باۋىجان ۇلى دەپ كورسەتىلگەن. ول «ورداباسى» فك-نىڭ بۇرىنعى پرەزيدەنتىنىڭ ۇلى بولىپ كورىنەدى. الايدا, شىمكەنت قالاسىنىڭ ادىلەت دەپارتامەنتىنىڭ مالىمەتى بويىنشا, وسى فەدەراتسيانىڭ باسشىسى رەتىندە ابدۋبايتوۆ باۋىرجان تويشىبەكوۆيچ تىركەلگەن.

جالپى العاندا, قازاقستان فۋتبول فەدەراتسياسىندا جانە بىرقاتار فۋتبول كلۋبتارىندا جۇرگىزىلگەن پروكۋرورلىق تەكسەرۋ قارجىلىق بۇزۋشىلىقتار مەن ءتيىمسىز باسقارۋدى انىقتادى, بۇل مەملەكەتكە 3 ميلليارد تەڭگە كولەمىندە شىعىن كەلتىردى.