جاڭالىقتار
«ورداباسى» فۋتبول كلۋبىندا الاڭعا شىقپايتىن ويىنشى 20 ميلليون تەڭگە جالاقى الادى
فوتو: قازاقستان فۋتبول فەدەراتسياسى
شىمكەنت قالاسى اكىمىنىڭ ورىنباسارى “ورداباسى” فۋتبول كلۋبىندا الاڭعا شىقپاي-اق ايىنا ميلليوندار الىپ وتىرعان فۋتبولشىلار بار ەكەنىن ايتتى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.
داۋ شىققان شىمكەنتتىك فۋتبول كومانداسىنا قاتىستى سۇراقتارعا جاۋاپ بەرگەن ول اسحات تاعىبەرگەننىڭ 20 ميلليون تەڭگەدەن از ايلىققا كونبەگەنىن دە جاسىرمادى. سوزىنشە “ورداباسىدا” قازىر ءۇش فۋتبولشىنىڭ ايلىعى 60 ميلليون تەڭگەنى قۇرايدى. ولار سەرگەي مالىي, ەۆگەني ماكارەنكو جانە اسحات تاعىبەرگەن. بىرەۋى 33, ەكەۋى 34 جاستا. ويىنشىلاردىڭ ءبىرى, تىپتى, ويىندا الاڭعا شىقپايتىنىن دا جەتكىزدى. وسىعان قاراماستان قالالىق اكىمدىك ەشقانداي شارا قولدانا الماي وتىر. ويتكەنى كلۋبتىڭ بۇرىنعى پرەزيدەنتى باۋىرجان ابدۋبايتوۆ ويىنشىلارعا ويعا كەلمەيتىن ايلىق تاعايىنداپ كەتكەن.
“قالا اكىمى باتپاققا باتقان فۋتبول كلۋبىن قابىلدادىق دەگەنى راس. 2018 جىلدان بەرگى قارىزى 2,5 ميلليارد تەڭگە ەدى. ونى قالا اكىمى تولىق جاپتىردى. 4 ايدان اسار-اسپاس قىزمەت ناتيجەسىندە باۋىرجان ابدۋبايتوۆ “ورداباسىنى” تاعى 2 ميلليارد تەڭگە قارىزعا باتىرعان. بىرنەشە فۋتبولشىعا ارتىق تولەنەتىن كەلىسىم-شارت جاساسقان. ونى ەشكىممەن كەلىسپەگەن. قازىر قۇزىرەتتى ورگاننان نەلىكتەن تەك فۋتبولشىلارمەن عانا كەلىسىپ, شەشىم شىعارعانىن سۇراپ جاتىرمىز. بۇل كەلىسىم-شارت 2025 جىلدىڭ سوڭىنا دەيىن بەكىتىلگەن. ءبىز وعان ەشقانداي شارا قولدانا المايمىز”, – دەيدى سارسەن قۇرانبەك.
اكىم ورىنباسارى فۋتبولشىلارمەن كەزدەسۋ ءوتىپ, ولاردىڭ باسىم بولىگى ايلىعىن ازايتۋعا كەلىسكەنىن ايتادى. ءسويتىپ, ويىنشىلاردىڭ جالاقىسى ابدۋبايتوۆ قويعان گوناراردان 40 پايىزعا ازايعان. بىراق بۇل وتىنىشكە تاعىبەرگەن باستاعان ءۇش ويىنشى سول كۇيى كەلىسپەپتى. پىكىرىن ءبىلۋ ءۇشىن حابارلاسقانىمىزدا, فۋتبولشىنىڭ ءوزى جاۋاپ بەرۋدەن باس تارتتى.
“ولاردىڭ ارى مەن نامىسىنا تاپسىردىق. بۇل قارجى بيۋدجەتتەن بولىنەدى. ونى ۇنەمدەۋدى كوزدەگەن بولاتىنبىز. ەندى ولاردان سول قارجىعا لايىقتى ويىن كورسەتۋدى سۇراۋدان باسقا امال جوق”, — دەيدى شىمكەنت اكىمىنىڭ ورىنباسارى.
ايتا كەتەيىك, بيىل “ورداباسى” فۋتبول كومانداسىنا جەرگىلىكتى بيۋدجەتتەن 3,2 ميلليارد تەڭگە بولىنگەن. بۇل بىلتىرعى قۇن سالىعىن قوسقانداعى سوممادان ەكى ەسە از. ال, كلۋبقا جاڭادان قوسىلعان لەگيونەرلەرگە 5,5 ميلليون تەڭگە تاعايىندالىپتى.
بۇعان دەيىن, شىمكەنت قالاسىنىڭ اكىمى اسحات تاعىبەرگەننىڭ 20 ميلليون تەڭگە جالاقى الاتىنىن, كوماندادان كەتپەي وتىرعانىن حابارلاعان ەدىك. ال فۋتبولشىنىڭ جۇبايى قالا باسشىسىنىڭ سىنىنا جاۋاپ بەرگەن بولاتىن.
