جاڭالىقتار
ورمان قىزمەتكەرلەرىنىڭ جالاقىسىنا 100% ۇستەمەاقى قوسىلادى
فوتو: gov.kz
بۇگىننەن باستاپ ەلىمىزدىڭ ورمان جانە تابيعات قورعاۋ مەكەمەلەرىنىڭ قىزمەتكەرلەرى لاۋازىمدىق جالاقىلارىنا قاراي 100 پايىز ۇستەمەاقى الا باستايدى. ءتيىستى قاۋلىعا ۇكىمەت باسشىسى ولجاس بەكتەنوۆ قول قويدى, دەپ جازادى Egemen.kz.
ورمان جانە تابيعات قورعاۋ ۇيىمدارىنىڭ قىزمەتكەرلەرىنە ەڭبەكاقى تولەۋ جۇيەسىن, شارتتارى مەن مولشەرىن جاقسارتۋ ماقساتىندا «ازاماتتىق قىزمەتشىلەرگە, مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە, قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» ۇكىمەت قاۋلىسىنا وزگەرىستەر ەنگىزىلدى.
قۇجاتقا سايكەس ورمان ءورتىن ءسوندىرۋ ستانسالارىنىڭ, ورمان مەكەمەلەرىنىڭ, تابيعات قورعاۋ جانە ورمان ورنالاستىرۋ ۇيىمدارىنىڭ قىزمەتكەرلەرى لاۋازىمدىق جالاقىلارىنا 100%-عا دەيىن ۇستەمەاقى الادى. ولاردىڭ ىشىندە ورمان ءورتىن سوندىرۋشىلەر, ءورت ءسوندىرۋ ماشينالارىنىڭ جۇرگىزۋشىلەرى, تراكتورشى-ماشينيستەر, راديووپەراتورلار, ءورت ءسوندىرۋ ماشينالارىن, جابدىقتارى مەن اپپاراتۋرالارىن جوندەيتىن سلەسارلار, ءورت-باقىلاۋ مۇناراسىنىڭ باقىلاۋشىلارى بار.
سونداي-اق 113 اۆياتسيالىق كۇزەت ءورت ءسوندىرۋشى-دەسانتشىسىنىڭ جالاقىسى كوبەيەدى.
قاۋلىنى ىسكە اسىرۋعا 2024-2027 جىلدارعا ارنالعان رەسپۋبليكالىق بيۋدجەتتەن 8 480,1 ملن تەڭگە كولەمىندە قارجىلىق شىعىندار ەسەپتەلگەن.
بارلىعى 3,3 مىڭعا جۋىق قىزمەتكەر قوسىمشا اقىمەن قامتىلادى.
جەرگىلىكتى اتقارۋشى ورگانداردىڭ ورمان شارۋاشىلىعى مەكەمەلەرىنىڭ ورمان ءورت ءسوندىرۋ ستانسالارىنىڭ 1619 قىزمەتكەرىنە قوسىمشا اقى جەرگىلىكتى بيۋدجەت قاراجاتى ەسەبىنەن تولەنەدى.
