«Orta eseppen 158 648 teńge jumsaıdy»: Qazaqstanda azyq-túlik kúnnen kúnge qymbattap barady

Foto: freepik.com

Qarapaıym halyqtyń tabysy tek kúndelikti tamaqqa ǵana jetedi. Ulttyq statıstıka bıýrosynyń málimetinshe, búginde bir adam úsh aıda orta eseppen 158 648 teńgeni tek azyq-túlikke jumsaıdy, dep jazdy qandastar.kz

Bul aqshanyń kóp bóligi et, nan, sút, kúrish pen qaraqumyq sııaqty negizgi ónimderge ketedi. Bul týraly Stan.kz aqparat agenttigi Informbıýro baǵdarlamasyna silteme jasap habarlaıdy.

Statıstıkaǵa sensek, kókónister de qazir arzan emes. Mysaly, dúkenderde kartoptyń bir kelisi – 396 teńgeden, al sábiz – 449 teńgeden bastap satylyp jatyr. Qazaqstandyqtar úsh aıda orta eseppen 312 myń teńge jumsaıdy. Sonyń jartysy – azyq-túlikke ketedi. Mysaly, etke – 48 myń, nan men jarmaǵa – 22 myń, sútke – 15 522 teńge jumsalady. Azyqqa ketken aqshadan keıin halyq kıim-keshek pen jıhaz alýǵa kóp shyǵyndalmaıdy.

Kókónis baǵasy da sharyqtap tur. Iriktelgen kartop – 460 teńge, jýylǵan sábiz – 499 teńge. Saýda komıteti muny maýsymaralyq kezeńmen baılanystyrady, ıaǵnı kókónister áli tolyq jınalyp bitpegen. Olar ónim tolyq shyqqanda baǵa túsedi dep úmittenip otyr.

Aýyl sharýashylyǵy mınıstrliginiń ókili Ersaıyn Dosymbetovtyń aıtýynsha, qazir 123,4 myń tonna kartop, 254,9 myń tonna oramjapyraq, 31,4 myń tonna sábiz, 12 myń tonna pııaz jınalyp, ishki naryqqa jetkizilgen.

Jyl basynda kartop baǵasy taǵy qymbattaǵan edi. Sol kezde úkimet tapshylyqty sebep etip, kartopty syrtqa shyǵarýǵa (eksportqa) tyıym saldy.

Ekonomıst Baýyrjan Ysqaqovtyń aıtýynsha, eksportqa shekteý qoıý arqyly ishki naryqtaǵy baǵany ustap turýǵa bolady. Biraq bul aýyl sharýashylyǵy salasyndaǵy kásipkerlerdiń tabysyn azaıtady, ıaǵnı olar óz ónimin syrtqa sata almaı, kiristen qaǵylady.

Ekonomıka mınıstri Serik Jumanǵarın qazirgi baǵany turaqty dep baǵalaıdy. Degenmen, mamandardyń aıtýynsha, kartop, sábiz, pııaz jáne qyryqqabat baǵasy maýsymnyń sońyna deıin tómendemeýi múmkin.

Eske salaıyq, buǵan deıin mamyrda Qazaqstanda ınflıaııa 11,3%-ǵa jetkenin jazǵan edik. Bir aıda azyq-túlik, qyzmet túrleri men taýarlar taǵy da qymbattaǵan. Lımon, alma, almurt pen júzimniń baǵasy aıtarlyqtaı ósken. Kıim-keshek pen qurylys materıaldary da qymbat. Kommýnaldyq tarıfter – sý, jaryq, gaz ben káriz aqysy kóterilgen. Temirjol men sanatorıı qyzmetteri de qymbattap otyr.