ورتالىق ازياداعى ەڭ مىقتى ارميا: شەرۋدە زاماناۋي اسكەري تەحنيكا كورسەتىلدى

فوتو: اقوردا

جەڭىستىڭ 80 جىلدىعىنا ارنالعان پاراد مايدانگەرلەردىڭ ەرلىگىنە تاعزىم ەتۋدى, تاۋەلسىز قازاقستان ارمياسىنىڭ بۇگىنگى كۇش-ايبىنىن كورسەتۋدى كوزدەيدى, دەپ حابارلايدى qandastar.kz Zakon.kz-كە سىلتەمە جاساپ.

پارادقا قازاقستان قارۋلى كۇشتەرىنىڭ بارلىق تۇرىنەن 4 مىڭنان اسا اسكەري قىزمەتكەر قاتىسىپ وتىر. سونداي-اق ارنايى 200-دەن اسا اسكەري قارۋ-جاراق پەن تەحنيكا, 66 اسكەري اۆياتسيا ۇشاعى مەن تىكۇشاق اكەلىنگەن.

«العاش رەت مەحانيكالاندىرىلعان كولوننالاردىڭ ساپىن «بۋك», «تور» زەنيتتى-راكەتا كەشەندەرى, «بارىس», «الان», «ايبار», «تايماس», «تەررەكس» دوڭگەلەكتى ۇرىس ماشينالارى, مينانى زالالسىزداندىراتىن روبوتتارى بار ارناۋلى اۆتوكولىكتەر تولىقتىرىپ وتىر», دەلىنگەن اقوردا حابارلاماسىندا.
سونىمەن قاتار وتاندىق قورعانىس ونەركاسىبى كەشەنىنىڭ كاسىپورىندارى شىعارۋدى جوسپارلاپ وتىرعان ۇرىس ماشينالارى, روبوتتاندىرىلعان قايىق جانە ۇشقىشسىز باسقارىلاتىن ۇشۋ قوندىرعىلارى تانىستىرىلادى.

اۋە كەڭىستىگىنەن ا-400 اسكەري-كولىك ۇشاعى, L-410 جولاۋشىلار ۇشاعى جانە بي-300 پاترۋل ۇشاعى ۇشىپ وتەدى.

بۇعان دەيىن رەسپۋبليكامىزدىڭ ءاربىر ءتورتىنشى تۇرعىنى اسكەرگە اتتانعانىن, مايدان دالاسىندا اتىلعان ءاربىر توعىزىنشى وق قازاقستاندا قۇيىلعانىن جازعانبىز.

2025 جىلى 7 مامىردا  ەلورداداعى باس الاڭدا ۇلى جەڭىستىڭ 80 جىلدىعىنا ارنالعان اسكەري پاراد وتۋدە. ونىڭ تىكەلەي كورسەتىلىمىنە مىنا  ارادان وتە الاسىزدار.