ورىنبور قازاقتارى قازاقستانعا تانىمدىق ساپارمەن كەلدى

«وتانداستار قورى» كەاق شەتەلدە تۇراتىن قازاقتارمەن جانە قازاق مادەني ورتالىقتارىمەن ۇنەمى بايلانىستا. سولاردىڭ ءبىرى – «ورىنبور ايماقتىق قازاق-ۇلتتىق مادەني اۆتونومياسى» ء(ارى قاراي – قوعامدىق ۇيىم).

اتالمىش قوعامدىق ۇيىمىنىڭ وكىلدەرى 2022 جىلدىڭ 17 اقپانىندا قازاقستانعا تانىمدىق ساپارمەن كەلىپ, «وتانداستار قورى» كوممەرتسيالىق ەمەس اكتسيونەرلىك قوعامنىڭ جۇمىسىمەن, ۇجىمىمەن تانىستى. بەكىتىلگەن كۇن تارتىبىنە سايكەس شەتەلدىك قوناقتار 18-19 اقپان كۇندەرى نۇر-Cۇلتان قالاسىندا قازاقتىڭ ۇلتتىق مادەنيەتى, ادەت-عۇرپى جانە قازاق ءتىلى تاقىرىبىنا قاتىستى شەبەرلىك ساعاتتارىنا قاتىسادى.

اتاپ ايتساق, «استانا بالەت» تەاترىندا ۇلتتىق بي ونەرى, قازاق ۇلتتىق ونەر ۋنيۆەرسيتەتىندە دومبىرا ۇيرەنۋ, «Hazifa شەبەرلىك مەكتەبىندە» حالقىمىزدىڭ قولونەرى, شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىندا «قازاق ءتىلىن وقىتۋدىڭ ادىستەمەسى» بويىنشا شەبەرلىك ساعات وتەدى. سونداي-اق لەۆ گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «قازاقتاردىڭ ەتنوگەنەزى. قازاقتاردىڭ رەسەي فەدەراتسياسى تەرريتورياسىنا قونىستانۋ تاريحى: ورىنبور وبلىسى. قازاقتاردىڭ ءداستۇرلى كوشپەلى شارۋاشىلىعى» تاقىرىپتارى اياسىندا دوڭگەلەك ۇستەل مەن دارىسكە قاتىسادى. قازاقستان رەسپۋبليكاسىنىڭ ۇلتتىق مۇراجايىندا ەلىمىزدىڭ تاريحى تۋرالى تىڭ دەرەكتەرمەن تانىسىپ, قاليبەك قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىندا «قۇنانباي» سپەكتاكلىنىڭ كورەرمەنى بولادى.

تانىمدىق ساپاردىڭ باستى ماقساتى – وزدەرى الىستا تۇرسا دا, قازاقستانعا كەلىپ, ۇلتتىق قۇندىلىقتاردى تانۋ ارقىلى ولاردى ورىنبور قازاقتارى اراسىندا ءارى قاراي دارىپتەۋ.