«ورىستان – ۋكراينعا»: ەلىمىزدە ۇلتىن اۋىستىرعاندار قاتارى ارتتى

 فوتو: tengrinews.kz

ىشكى ىستەر مينيسترلىگىنىڭ مالىمەتىنشە,  ۇلتىن وزگەرتۋ بويىنشا ەڭ كوپ ءوتىنىش 2022 جىلدىڭ ءساۋىرى مەن 2023 جىلدىڭ تامىزى ارالىعىندا بولعان.

جەكە باسىن كۋالاندىراتىن قۇجاتتاردا ۇلتىن وزگەرتكىسى كەلگەندەر سانى:
2021 جىلى – 3254 ادام;
2022 جىلى – 3363 ادام;
2023 جىلى – 3366 ادام;
2024 جىلى (وسى كۇنگە دەيىن) – 2158 ادام.

«قازاقستان رەسپۋبليكاسى كونستيتۋتسياسىنىڭ 19-بابىنىڭ 1-تارماعىنا سايكەس اركىم ءوزىنىڭ ۇلتتىق, پارتيالىق جانە ءدىني ۇستانىمىن ايقىنداۋعا جانە كورسەتۋگە نەمەسە كورسەتپەۋگە قۇقىلى. بۇل نورما قۇقىقتى, ياعني ادامنىڭ ءوزىنىڭ ۇلتتىق ەرەكشەلىگىن انىقتاۋعا جانە كورسەتۋگە بايلانىستى سۋبەكتيۆتى مۇمكىندىكتەرىن بەكىتەدى»,—دەپ ءتۇسىندىردى مينيسترلىك. 

قازاقستان ازاماتىنىڭ ۇلتى اتا-اناسىنىڭ ءبىرىنىڭ ۇلتى بويىنشا انىقتالادى. اتا-انالاردىڭ ۇلتى ءارتۇرلى بولعان جاعدايدا ونى انىقتاۋدىڭ ارنايى ءتارتىبى قولدانىلادى. ياعني, بالانىڭ قالاۋى بويىنشا اكەسىنىڭ نەمەسە اناسىنىڭ ۇلتىنا سايكەس, وعان جەكە كۋالىك جانە پاسپورت بەرۋ كەزىندە ايقىندالادى.  كەيىن ۇلتتى ءبىر رەت اتا-انانىڭ قاي ءبىرىنىڭ ۇلتىنا وزگەرتۋگە بولادى. 

رەسمي مالىمەتكە سۇيەنسەك, قازاقستاندىقتار اراسىندا ۇلتىن “ورىستان» «نەمىسكە» – 743, «وزبەكتەن» «قازاققا» – 354, «ورىستان» «ۋكراينعا» – 300, «ۋكرايننان» «ورىسقا» – 246, «ورىستان» «قازاققا» – 118  ادام اۋىستىرعان.

ايتا كەتەيىك, ۇلتىن وزگەرتۋ تۋرالى شەشىم ەكى جۇمىس كۇنى ىشىندە شىعارىلادى.