«ورىستار الدەقايدا اقىلدىراق, ولارسىز ءومىر ءسۇرۋ قيىن» – مارعۇلان تۇرسىنوۆ

فوتو: ينستاگرام

بەلگىلى باق-تىڭ نەگىزىن قالاعان مارعۇلان تۇرسىنوۆ ورىس حالقىنا دەگەن ەرەكشە ىقىلاسىن اشىق ايتتى, دەپ حابارلايدى  qandastar.kz   Orda.kz-كە سىلتەمە جاساپ.

ZTB مەدياسىنىڭ نەگىزىن قالاعان مارعۇلان تۇرسىنوۆ سوڭعى ۋاقىتتا ەلدە ورىستارعا قاتىستى ۇلتشىلدىق كۇشەيىپ جاتقانىن ايتىپ, ولارعا دەگەن ەرەكشە ىقىلاسىن ءبىلدىردى.

«مەن كوپ ماسەلە بويىنشا سولارعا جۇگىنەمىن: تەحنيكا جوندەۋ, كولىك, ديزاين, بۋحگالتەريا… سەبەبى ولار الدەقايدا ءبىلىمدى, الدەقايدا جاۋاپتى جانە تۇراقتى دەپ ەسەپتەيمىن. اشىعىن ايتسام, ولارسىز كۇندەلىكتى تۇرمىسىمدا ماعان وتە قيىن بولادى» دەپ جازدى ول الەۋمەتتىك جەلىدە.

تۇرسىنوۆ قاي ۇلتپەن سالىستىرعاندا ورىس ۇلتىنىڭ ءباسى جوعارى بولىپ تۇرعانىن اشىق ايتپادى.

الايدا ارادا كوپ وتپەي, تۇرسىنوۆ سول جازباسىن ءوشىردى. كەيىن ول ءوزىنىڭ ويىن دۇرىس جەتكىزە الماعانىن ايتىپ, قازاق حالقىنان كەشىرىم سۇرادى.

«مەن ءوز حالقىمنىڭ پاتريوتىمىن. ايتايىن دەگەنىم, ءبىز الەۋمەتتىك ومىردە ورىستاردان ۇيرەنەتىن دۇنيەلەر از ەمەس. ۇلتارالىق ارازدىقتى قوزدىرماي, كەرىسىنشە, ءار ازاماتتى سىيلاي بىلەيىك» دەپ تۇزەدى ول كەيىنگى جازباسىنداعى ويىن.

ءبىر ساعاتتان كەيىن تۇرسىنوۆ تاعى ءبىر جازبا جازىپ, قازاقتاردىڭ شاپ بەرىپ, وسەك ايانعا كىرىسەتىندەرىن اتاپ كورسەتتى. سونداي-اق, جۋرناليست سوقىر پاتريوتتىقتى قويىپ, وزىمىزگە باعا بەرۋدى ۇيرەنۋ كەرەكتىگىن ايتتى.

«ءبىز سونداي ىسكەر بولساق, نەگە ءۇيىمىزدى وزبەكتەرگە سالعىزامىز, كولىگىمىزدى ورىستارعا جوندەتەمىز, ينفراقۇرىلىمدى قىتايلارعا تاۋەلدى ەتەمىز? اباي اتامىزدىڭ ءوزى قازاقتىڭ كەمشىلىگىن ايتقان, ءبىز نەگە ءوزىمىزدى سىننان جوعارى قويامىز?» دەپ جازدى ول.

مارعۇلان تۇرسىنوۆتىڭ ورىستار جايلى جازعان پىكىرى زاڭ اياسىندا تەكسەرىلۋى مۇمكىن. بۇل تۋرالى بەلگىلى PR-مامانى ايبار ولجاي مالىمدەدى.

ولجايدىڭ ايتۋىنشا, تۇرسىنوۆتىڭ «ولار الدەقايدا ءبىلىمدى, الدەقايدا جاۋاپتى جانە تۇراقتى» دەگەن ويى — ءبىر ۇلتتى ەكىنشى ۇلتتان جوعارى قويۋ بولىپ سانالادى جانە بۇل گيتلەردىڭ «اريلىك ءناسىلدىڭ ۇستەمدىگى» تۋرالى فاشيستىك يدەولوگياسىمەن ۇقساس.

«بۇل تۇرعىدا مارعۇلان تۇرسىنوۆ قر قىلمىستىق كودەكسىنىڭ 174-بابىن — ۇلتارالىق ارازدىقتى قوزدىرۋ بابىن — بۇزۋى مۇمكىن. وسىعان بايلانىستى مەن باس پروكۋراتۋراعا ءتيىستى مالىمەتتەردى تىركەپ, ارىز جولدادىم. پروكۋراتۋرا نە ءوزى تەكسەرەدى, نە ىشكى ىستەر مينيسترلىگىنە جولدايدى» دەپ جازدى ول.

ەسكە سالا كەتەيىك, وزبەكستاندىق تاريحشى قازاقتاردىڭ «ءوز مەملەكەتى ەشقاشان بولماعان» دەپ مالىمدەگەن ەدى.