«Orystar áldeqaıda aqyldyraq, olarsyz ómir súrý qıyn» – Marǵulan Tursynov

Foto: ınstagram

Belgili BAQ-tyń negizin qalaǵan Marǵulan Tursynov orys halqyna degen erekshe yqylasyn ashyq aıtty, dep habarlaıdy  qandastar.kz   Orda.kz-ke silteme jasap.

ZTB medıasynyń negizin qalaǵan Marǵulan Tursynov sońǵy ýaqytta elde orystarǵa qatysty ultshyldyq kúsheıip jatqanyn aıtyp, olarǵa degen erekshe yqylasyn bildirdi.

«Men kóp másele boıynsha solarǵa júginemin: tehnıka jóndeý, kólik, dızaın, býhgalterııa… Sebebi olar áldeqaıda bilimdi, áldeqaıda jaýapty jáne turaqty dep esepteımin. Ashyǵyn aıtsam, olarsyz kúndelikti turmysymda maǵan óte qıyn bolady» dep jazdy ol áleýmettik jelide.

Tursynov qaı ultpen salystyrǵanda orys ultynyń bási joǵary bolyp turǵanyn ashyq aıtpady.

Alaıda arada kóp ótpeı, Tursynov sol jazbasyn óshirdi. Keıin ol óziniń oıyn durys jetkize almaǵanyn aıtyp, qazaq halqynan keshirim surady.

«Men óz halqymnyń patrıotymyn. Aıtaıyn degenim, biz áleýmettik ómirde orystardan úırenetin dúnıeler az emes. Ultaralyq arazdyqty qozdyrmaı, kerisinshe, ár azamatty syılaı bileıik» dep túzedi ol keıingi jazbasyndaǵy oıyn.

Bir saǵattan keıin Tursynov taǵy bir jazba jazyp, qazaqtardyń shap berip, ósek aıanǵa kirisetinderin atap kórsetti. Sondaı-aq, jýrnalıst soqyr patrıottyqty qoıyp, ózimizge baǵa berýdi úırený kerektigin aıtty.

«Biz sondaı isker bolsaq, nege úıimizdi ózbekterge salǵyzamyz, kóligimizdi orystarǵa jóndetemiz, ınfraqurylymdy qytaılarǵa táýeldi etemiz? Abaı atamyzdyń ózi qazaqtyń kemshiligin aıtqan, biz nege ózimizdi synnan joǵary qoıamyz?» dep jazdy ol.

Marǵulan Tursynovtyń orystar jaıly jazǵan pikiri zań aıasynda tekserilýi múmkin. Bul týraly belgili PR-mamany Aıbar Oljaı málimdedi.

Oljaıdyń aıtýynsha, Tursynovtyń «olar áldeqaıda bilimdi, áldeqaıda jaýapty jáne turaqty» degen oıy — bir ultty ekinshi ulttan joǵary qoıý bolyp sanalady jáne bul Gıtlerdiń «arıılik násildiń ústemdigi» týraly fashıstik ıdeologııasymen uqsas.

«Bul turǵyda Marǵulan Tursynov QR Qylmystyq kodeksiniń 174-babyn — ultaralyq arazdyqty qozdyrý babyn — buzýy múmkin. Osyǵan baılanysty men Bas prokýratýraǵa tıisti málimetterdi tirkep, aryz joldadym. Prokýratýra ne ózi tekseredi, ne Ishki ister mınıstrligine joldaıdy» dep jazdy ol.

Eske sala keteıik, О́zbekstandyq tarıhshy qazaqtardyń «óz memleketi eshqashan bolmaǵan» dep málimdegen edi.