«ورىستار بولماسا قازاقستان مەملەكەت بولار ما ەدى?»: دەمالىس ورنى قازاقشا قىزمەت كورسەتپەي قويعان

فوتو: Dalanews.kz

الاكولدەگى دەمالىس ورنى قازاق تىلىندە قىزمەت كورسەتۋدەن باس تارتىپ, كليەنتكە دورەكى جاۋاپ بەرىپ, «ورىستار بولماسا قازاقستان دا بولماس ەدى» دەپ وتكىر مالىمدەمە جاساعان, دەپ حابارلايدى  qandastar.kz Dalanews.kz-كە سىلتەمە جاساپ.

بۇل تۋرالى Threads قولدانۋشىلارى جازدى. اۋەلى دەمالىس ورنى ورىسشا جاۋاپ بەرگەندىكتەن كليەنت تۇسىنبەگەنىن ايتقان.

ارتىنشا ديالوگتى قازاقشا جالعاستىرىپ ەدى «اقىماقسىز با? سىزگە قاي تىلدە جازۋ كەرەك?» دەپ دورەكىلىك تانىتقان.

كليەنت تەك دەمالىس ورىندارى تۋرالى اقپارات كەرەك ەكەنىن ايتقان.

«ورىسشا تۇسىنبەيمىن. ول سىزگە ۇناماي ما? مەملەكەتتىك ءتىلدى سىيلامايسىز با?», — دەگەن كليەنت.

كليەنتتىڭ بۇل وتىنىشىنە دەمالىس ورنى دورەكى جاۋاپ بەرگەن.

ء«بىز, ورىستار بولماساق, سەندەردىڭ ەلدەرىڭ مەملەكەت بولار ما ەدى? تاۋەلسىزدىك العان كەزدە ءبارى سولاي بولعانى ءۇشىن ءبىز كىنالىمىز بە? سەندەردىڭ ۇكىمەتتەرىڭ جەمقورلىققا سالىنىپ, حالقىڭىزدى تىلگە ۇيرەتپەگەنى ءۇشىن ءبىز كىنالىمىز بە?», — دەيدى دەمالىس ورنى.

قازنەت رەاكتسياسى

ابدۋللا مۇحامەد ەسىمدى قولدانۋشى دەمالىس ورنى قازاقستان ەگەمەندىگىنە ءتىل تيگىزگەنىن ايتادى.

«دوستار مىنا alakol.ostrovok دەگەن دەمالىس ورنىنىڭ اكىمشىسى قازاقستان ەگەمەندىگىنە ءتىل تيگىزگەن.بۇل سكرينشوت سول دەمالىس ايماعىنىڭ اكىمشىسىمەن دەمالۋعا بارعىسى كەلگەن جىگىتتىڭ قىسقاشا جازباسى.دوستار ينستاگرامىن بەلگىلەپ كەتتىم. بارىنشا تاراتايىق,بولىسەيىك», — دەيدى ول.

دارحان اناربەك ۇلى ەسىمدى قولدانۋشى مۇنداي جاعدايلاردان ەشكىم ساباق الىپ جاتقان جوق دەيدى.

«قازاقستاندا تۇرىپ, ءوز تۋعان جەرىمىزدە قازاقشا قىزمەت كورسەتىلۋىن تالاپ ەتۋىمىزدىڭ ءوزى ابسۋرد نەگىزى. وسىنداي جاعداي كۇندە قايتالانۋدا. بىراق ساباق الىپ جاتقان ەشكىم جوق», — دەيدى ول.

«بالاقتاعى بيت باسقا شىقتى دەگەن وسى, اعايەەەن! بۇلاردىڭ سىرى بۇرىننان بەلگىلى. بەتىمىزگە وتىرىك ك ۇلىپ, ىشتەرىنەن ءپۇتىن اكەلەرىن ساعىنىپ وتىرادى. ترەدستە زاڭگەرلەر وتىرسا, ءبارىمىز جابىلىپ ە-ءوتىنىش ارقىلى ارىزدانايىق! سوڭعى كەزدەرى قازاق پەن ورىستىڭ اراسى ءورشيىن دەپ تۇر. قازاقتى ادام قىلعان وسىلار ەكەن-ءمىس. نە دەيمىز, شىعىپ كەتسىن بە حالقىم?!»,  — دەيدى ارداق جاپاروۆا ەسىمدى قولدانۋشى.

قازىرگى تاڭدا قازاقستاندىقتار اتالعان دەمالىس ورنىنىڭ ۇستىنەن e-otinish پورتالىنا ارىز تۇسىرە باستاعان.

ءبىز دەمالىس ورنىنىڭ وزىمەن بايلانىسۋعا تىرىستىق. الايدا ازىرگە بۇل جايتقا قاتىستى ناقتى جاۋاپ بەرىلمەدى.