جاڭالىقتار
وسكەمەندە جۇرەگى توقتاپ قالعان تۇرعىن قايتا ءتىرىلدى
وسكەمەندە فەلدشەرلەر بريگاداسى جۇرەگى توقتاپ قالعان ناۋقاستى قايتا ءتىرىلتىپ الدى, دەپ حابارلايدى Qandastar.kz اقپارات پورتالى.
وقيعا 18 ماۋسىم كۇنى تاڭەرتەڭ بولعان. ساعات 04:35-تە جەدەل جاردەم قىزمەتىنە 67 جاستاعى ەر ادامنان قوڭىراۋ كەلىپ تۇسكەن: ول قاتتى ەنتىگۋگە, جۇرەك قاعىسىنىڭ جيىلەۋىنە جانە ينفاركت بەلگىلەرىنە شاعىمدانعان. وقيعا ورنىنا فەلدشەرلەر الفيا يسمايلوۆا مەن ليلناز ەرحاتوۆا جانە جۇرگىزۋشى رادجان بايعازيدەن قۇرالعان بريگادا شىققان.
العاشقى كومەك كورسەتىلىپ, ەكگ تۇسىرىلگەننەن كەيىن ناۋقاستى اۋرۋحاناعا جەتكىزۋ باستالدى. جولدا ونىڭ جاعدايى كۇرت ناشارلاپ, اۋىر اريتميا پايدا بولىپ, جۇرەگى توقتاپ قالعان. بريگادا دەرەۋ جۇرەك-وكپە رەانيماتسياسىن باستادى. ەكى تسيكل سلر-دان كەيىن جۇرەك قاعىسى قالپىنا كەلدى.
«ناۋقاس وبلىستىق اۋرۋحاناعا جەتكىزىلىپ, مەديتسينالىق توپقا تاپسىرىلدى. قازىر ونىڭ جاعدايى تۇراقتى», – دەپ حابارلادى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.
ءباسپاسوز قىزمەتىنىڭ مالىمەتىنشە, بۇل فەلدشەر يسمايلوۆانىڭ تاجىريبەسىندەگى وسىنداي ەكىنشى جاعداي. العاشقىسى 2024 جىلعى ساۋىردە سولنەچنىي اۋىلىندا بولعان.
ول كەزدە دە 57 جاستاعى ەر ادامنىڭ ءومىرىن جۇرەك توقتاعاننان كەيىن امان الىپ قالعان. ەكى جاعدايدا دا تاجىريبەلى بريگادانىڭ ۇيلەسىمدى ارەكەتى شەشۋشى ءرول اتقاردى.
