Jańalyqtar
Ota 2 saǵatqa sozyldy: Qazaqstandyq dárigerler naýqastyń ishinen 30 kelilik qaterli isikti alyp tastady
Foto: Qazaq onkologııa jáne radıologııa ǵylymı-zertteý ınstıtýty
Almatyda qazaq onkologııa jáne radıologııa ǵylymı-zertteý ınstıtýtynyń dárigerleri naýqas áıeldiń ishinen salmaǵy 30 keli qaterli isikti alyp tastady. Bul týraly Stan.kz aqparat agenttigi habarlaıdy.
Onkogınekologtar toby buryn-sońdy bolmaǵan ota jasady. 65 jastaǵy áıel ishi aýyryp, isip ketkenin aıtyp, aýrýhanaǵa kelgen. Dárigerlerdiń aıtýynsha, naýqas alǵash ret 2023 jyly ishiniń tómengi jaǵy aýyratynyn aıtyp kelgen. 2024 jyly maýsym aıynan bastap áıeldiń ishi isinip, júrýi qıyndaı tústi. Ish qýysynyń kompıýterlik tomografııasyn túsirgende jambas súıeginen úlken isik anyqtaldy.
Qazaq onkologııa jáne radıologııa ǵylymı-zertteý ınstıtýtynyń basshysy 13 tamyzda onkogınekologııa ortalyǵynda naýqastyń syrqaty týraly talqylanyp, dereý hırýrgııalyq ota jasaý usynylǵanyn aıtty. Áıel aýrýhanaǵa jatqyzylyp, oǵan shuǵyl ota jasaldy.
Úsh kezeńnen turǵan ota 2 saǵatqa sozyldy. Gıstologııalyq zertteý nátıjeleri boıynsha naýqasqa analyq bezdiń qaterli isigi degen dıagnoz qoıyldy. Naýqastyń aıaǵyndaǵy tamyrlary aýyratyndyqtan dárigerler aldymen eki jaqty krossektomııa jasady. Odan keıin oń jaq analyq bezdiń úlken isigi alynyp tastalyp, tolyq adneksaldy gısterektomııa jasaldy. Sondaı-aq dárigerler úlken súıek qabyǵyn alyp tastady. Operaııanyń sońǵy kezeńine sozylǵan ishtiń aldyńǵy qabyrǵasyn túzetý úshin abdomınoplastıka jasady.
Dárigerler óz tájirıbesinde mundaı otalar bolǵanyn aıtty. Alaıda mundaı úlken qaterli isikti alǵash ret kórýi.
“Jyl saıyn bizdiń ınstıtýtta osyndaı klınıkalyq jaǵdaılar bolyp turady. Degenmen bul naýqasta anyqtalǵan analyq bez isiginiń kólemi bizdi ǵana emes, sonymen qatar AQSh, Ulybrıtanııa, TMD men Okeanııa elderindegi jetekshi onkologııalyq mekemelerdegi áriptesterimizdi de tańǵaldyrdy. Olardyń tájirıbesinde buryn-sońdy mundaı kólemdi isik bolmaǵan. Alynǵan tyǵyz kapsýlaly isiktiń salmaǵy shamamen 30-35 keli boldy”, – deıdi Qazaqstan onkologııa jáne radıologııa ǵylymı-zertteý ınstıtýtynyń basshysy Dılıara Qaıdarova.
Buǵan deıin Jambyl oblysynda dárigerler naýqastyń ishinen 6 kelilik qaterli isikti alyp tastaǵan edi.
