وتاندىق برەندتەر نەگە كەڭىنەن ساتىلىمعا شىقپايدى: تانىمال قازاق ديزاينەرلەرى اعىنان جارىلدى

سوڭعى ۋاقىتتا قولى شەبەر, تىككەن كيىمى كوزدىڭ جاۋىن الىپ, ەرەكشە ءسان بەرەتىن قازاقستاندىق ديزاينەرلەر كوبەيىپ كەلەدى,-دەپ حابارلايدى Qandastar.kz

وتاندىق شەبەرلەردىڭ ونىمدەرى شەتەلدىك باسەكەلەستەرىن ىعىستىرا الۋعا لايىقتى.

قوستانايدا وتاندىق جانە جەرگىلىكتى ءسان سەركەلەرىنىڭ باسىن قوسقان Kazakhstan fashion week Kostanay ءسان اپتالىعى ءوتتى. جوبانىڭ نەگىزىن قالاۋشى الەكسەي دجەننىڭ ايتۋىنشا, الەمدىك ءساندى قالىپتاستىرۋشى ميلان, پاريج سەكىلدى حالىقارالىق ديزاينەرلەردىڭ باسىن قوسقان ءسان رەەسترىنە ورتالىق ازيا ەلدەرىنەن قازاقستاندىق وسى ۇيىم عانا ەنگەن. بۇل ۇجىمنىڭ باستى ماقساتى – ەل تۇرعىندارىنا وتاندىق ديزاينەرلەردى دارىپتەي وتىرىپ, شەبەرلەرىمىز تىككەن كيىمدەردى كيگىزۋ. ديزاينەردىڭ سوزىنشە, قازىر وتاندىق ءسان سەركەلەرىنىڭ كيىمىنە سۇرانىس مول.

«قازاقستاندىق ديزاينەرلەر پايدا بولا باستاعاندا ولاردىڭ كيىمدەرىن جەرلەستەرىمىزگە «كۇشتەپ» كيگىزەتىنبىز. ولار وتاندىق كيىمدى تويعا نە جۇمىسقا كيىپ بارعاندا بۇل قازاقستاندىق ديزاينەردىڭ قولىنان شىققان ءونىم ەكەنىن ايتۋعا ۇيالاتىن, ۇستىنە جاراسىپ تۇرسا دا جاسىرىپ قالاتىن. قۇدايعا شۇكىر, بۇل كۇندەردەن وتتىك. بۇگىندە ەلىمىزدىڭ اتاقتى, قالتالى, تانىمال تۇلعالارى ءبىزدىڭ ديزاينەرلەردىڭ كيىمدەرىن ماقتانىشپەن كيىپ ءجۇر. ءبىز دە ءالى سول «قازاقاستان تۇرعىندارىنا قازاق كيىمدەرىن كيگىزۋ» دەگەن ۇراننان جاڭىلماي, سول ماقساتتا ەڭبەك ەتىپ كەلەمىز. ءبىز وسىنداي دارەجەگە جەتۋ ءۇشىن كوپ ىزدەندىك. شەتەلدىك بەلگىلى شەبەرلەردى شاقىرىپ, شەبەرلىك ساعاتتارىن وتكىزدىك. قازىرگى وتاندىق ءسان سەركەلەرى دە پاريج, ميلاندا كوپ وقىپ, ىزدەنىپ, ءبىلىمىن جەتىلدىردى», – الەكسەي دجەن.