Otandyq brendter nege keńinen satylymǵa shyqpaıdy: tanymal qazaq dızaınerleri aǵynan jaryldy

Sońǵy ýaqytta qoly sheber, tikken kıimi kózdiń jaýyn alyp, erekshe sán beretin qazaqstandyq dızaınerler kóbeıip keledi,-dep habarlaıdy Qandastar.kz

Otandyq sheberlerdiń ónimderi sheteldik básekelesterin yǵystyra alýǵa laıyqty.

Qostanaıda otandyq jáne jergilikti sán serkeleriniń basyn qosqan Kazakhstan fashion week Kostanay sán aptalyǵy ótti. Jobanyń negizin qalaýshy Alekseı Djenniń aıtýynsha, álemdik sándi qalyptastyrýshy Mılan, Parıj sekildi halyqaralyq dızaınerlerdiń basyn qosqan sán reestrine Ortalyq Azııa elderinen qazaqstandyq osy uıym ǵana engen. Bul ujymnyń basty maqsaty – el turǵyndaryna otandyq dızaınerlerdi dáripteı otyryp, sheberlerimiz tikken kıimderdi kıgizý. Dızaınerdiń sózinshe, qazir otandyq sán serkeleriniń kıimine suranys mol.

«Qazaqstandyq dızaınerler paıda bola bastaǵanda olardyń kıimderin jerlesterimizge «kúshtep» kıgizetinbiz. Olar otandyq kıimdi toıǵa ne jumysqa kıip barǵanda bul qazaqstandyq dızaınerdiń qolynan shyqqan ónim ekenin aıtýǵa uıalatyn, ústine jarasyp tursa da jasyryp qalatyn. Qudaıǵa shúkir, bul kúnderden óttik. Búginde elimizdiń ataqty, qaltaly, tanymal tulǵalary bizdiń dızaınerlerdiń kıimderin maqtanyshpen kıip júr. Biz de áli sol «Qazaqastan turǵyndaryna qazaq kıimderin kıgizý» degen urannan jańylmaı, sol maqsatta eńbek etip kelemiz. Biz osyndaı dárejege jetý úshin kóp izdendik. Sheteldik belgili sheberlerdi shaqyryp, sheberlik saǵattaryn ótkizdik. Qazirgi otandyq sán serkeleri de Parıj, Mılanda kóp oqyp, izdenip, bilimin jetildirdi», – Alekseı Djen.