وتاندىق عالىمدار «فوتوكاتاليزاتور» جاسادى

ەلىمىزدەگى تازا سۋ قورى جىل ساناپ ازايىپ كەلەدى. «الداعى سەگىز جىلدا تىرشىلىك نارىنە تاپشىلىق 15 پايىزعا جەتۋى مۇمكىن». ساراپشىلار وسىلاي دەيدى. قازىر ماسەلەنى شەشۋگە وتاندىق عالىمدار اتسالىسىپ جاتىر. ولار سۋداعى لاستاۋشى زاتتاردىڭ ىدىراۋىن جەدەلدەتەتىن «فوتوكاتاليزاتور» جاساپ شىعاردى.

ونىڭ ەكولوگياعا دا وڭ اسەرى بار كورىنەدى. ادامزات ءۇشىن اۋادان كەيىنگى قاجەتتىلىك سۋدا. ونسىز تىرشىلىك توقتايدى. بىراق ول شەكتەۋلى رەسۋرسقا اينالدى. تازا سۋ قورىنىڭ كولەمى ازايىپ جاتىر. ماسەلەنى شەشۋگە وتاندىق عالىم باتۋحان تاتىقاەۆ 4 ادامنان قۇرالعان كومانداسىمەن كىرىسكەن.

مىسالى مىنا ۇنتاق تارىزدەس زات «فوتوكاتاليزاتور» دەپ اتالادى. ول كۇن ساۋلەسىنىڭ اسەرىنەن سۋداعى لاستاۋشى زاتتاردىڭ زيانسىز ەلەمەنتتەرگە ىدىراۋىن تەز ىسكە اسىرادى. سونداي-اق ول وڭاي سينتەزدەلەدى. باتۋحان تاتىقاەۆ, ەنەرگيا ساقتاۋ جۇيەلەرى زەرتحاناسىنىڭ جەتەكشى عىلىمي قىزمەتكەرى: — فوتوكاتاليزاتوردى قورشاعان ورتانى تازارتۋ جانە جاسىل سۋتەكتى ءوندىرۋ ءۇشىن قولدانامىز.

قورشاعان ورتانى تازارتۋ دەگەنىمىزدە ورگانيكالىق زاتتارمەن لاستانعان سۋلاردى فوتوكاتاليتيكالىق جولمەن تازارتۋ جانە اۋاداعى ورگانيكالىق ۇشكىر زاتتاردى وسى جولمەن تازارتۋ بولىپ تابىلادى. ءبىز قورشاعان ورتاعا زيانى از تيەتىن تەحنولوگيالاردى دامىتۋىمىز كەرەك. ال ەندى حيميالىق تەحنولوگيا دەگەندە, ءاردايىم بىزگە ەنەرگيا كوزى كەرەك. ول – كۇن ساۋلەسى. «قازىر ەلىمىزدە 600 مىڭنان استام ادام تازا اۋىزسۋعا ءزارۋ. بۇل رەسمي ستاتيستيكا. 2040 جىلعا تامان ونىڭ تاپشىلىعى 50 پايىزعا جەتەدى دەگەن بولجام دا بار. ال 2050-ءشى جىلى ەلىمىز «سۋعا وتە مۇقتاج» ەلدەردىڭ ساناتىنا كىرۋى مۇمكىن. سوندىقتان ەكولوگياعا وڭ اسەرى تيەتىندەي سۋ تازارتاتىن جاڭا تەحنولوگيالاردى جاساعان عالىمدارعا قولداۋ قاجەت», — دەيدى ساراپشىلار. ايجان سقاقوۆا, ەكولوگ: — قازاقستاندا سۋ رەسۋرستارىنا, اسىرەسە ونىڭ لاستانۋىنا اكەلەتىن ونەركاسىپ ورىندارى كوپ. قازىر ەلدەگى 69 وزەن «لاستانعان» ساناتىنا كىرەدى. تەك 9-ى «ورتاشا لاستانعان» قاتارىندا. مۇنداي كورسەتكىشتەر كوڭىل كونشىتپەيدى. ءبىز ەكولوگيا مەن تىرشىلىك ءنارىنىڭ لاستانۋىنا جول بەرمەۋىمىز كەرەك.

ال بۇل رەتتە, ارنايى تەحنولوگيا ويلاپ تاباتىن عالىمداردىڭ ءرولى ايىرىقشا. ولارعا قولداۋ قاجەت. وسىدان 2 جىل بۇرىن باتۋحان تاتىقاەۆتىڭ باستاۋى عىلىم جانە جوعارى ءبىلىم مينيسترلىگى تاراپىنان قولداۋ تاپتى. جاڭا تەحنولوگيانى زەرتتەپ, ونى جاساپ شىعارۋ جوباسىنا ۆەدومستۆو 50 ميلليون تەڭگەدەن استام قارجى بولگەن.