وتاندىق تاۋار وندىرۋشىلەر ساۋدا جەلىلەرىمەن كەلىسىم-شارت جاساۋدا قانداي قيىندىققا كەزىگەدى?

فوتو: اشىق دەرەككوز

ساۋدا كوميتەتىندە وتاندىق تاۋار وندىرۋشىلەردىڭ ساۋدا سورەلەرىنە شىعۋ مۇمكىندىگى ونلاين رەجيمدە وتكەن جيىندا ءتۇسىندىرىلدى. ونلاين جيىن قر سيم ساۋدا كوميتەتى توراعاسىنىڭ ورىنباسارى ەرنۇر جاۋتىكباەۆتىڭ توراعالىعىمەن ءوتتى. ونلاين باسقوسۋعا ەلىمىزدەگى 100-دەن استام تاۋار ءوندىرۋشى, جەرگىلىكتى اتقارۋشى ورگان قىزمەتكەرلەرى مەن ساۋدا جەلىلەرى وداعى, «Magnum Cash&Carry», «Small&Skif» سياقتى 50-دەن استام ءىرى ساۋدا جەلىسىنىڭ  وكىلدەرى قاتىستى. 2 ساۋدا جەلىسىنىڭ وكىلى ساۋدا سورەلەرىنە ونىمدەرىن قويۋ ءۇشىن قويىلاتىن تالاپتار مەن ەرەجەلەردى ءتۇسىندىردى, دەپ جازادى qandastar.kz

وتاندىق ءونىم وندىرۋشىلەردى قولداۋ: ساۋدا جەلىلەرى نە دەيدى?

ساۋدا جەلىلەرى وداعى توراعاسىنىڭ ورىنباسارى ەرلان جايلاۋبايدىڭ دەرەگىنشە, ەلدەگى بولشەك ساۋداداعى ساۋدا جەلىلەرىنىڭ ۇلەسى 30% قۇرايدى. الماتى, شىمكەنت, استانا سياقتى مەگوپوليستەردە بۇل كورسەتكىش 50-60 پايىزعا دەيىن جەتەدى. ەلىمىزدىڭ وڭىرلەرىندە بولشەك ساۋدانىڭ باسىم ۇلەسى ءداستۇرلى ساۋدا مەن جارمەڭكەلەرگە تيەسىلى. وڭىرلەردەگى ساۋدا جانە تۇتىنۋشىلاردىڭ قۇقىعىن قورعاۋ دەپارتامەنتتەر جۇرگىزگەن مونيتورينگ ناتيجەسىنە ساي ساۋدا جەلىلەرىندەگى وتاندىق ءونىمنىڭ ۇلەسى 50 پايىزدان اسادى.

«ءبىزدىڭ ساۋدا جەلىسى وتاندىق ءونىمدى قولدايدى. قازىرگى تاڭدا ءبىزدىڭ جەلىلەردەگى ءونىمنىڭ 85%-ى قازاقستاندا جاسالعان. وزىمىزدە اسسورتيمەنتكە جاۋاپتى ءبولىم بار. تاۋاردىڭ اسسورتيمەنتىنە قاراپ, كۆوتا بولەمىز», – دەدى «Magnum Cash&Carry» جەلىسىنىڭ وكىلى ەۆگەني جىلنيكوۆ.

«بىزدە ساۋدا سورەلەرىنە كىرۋگە ەشقانداي كەدەرگى جوق. وتاندىق تاۋاروندىرۋشىلەرگە ايرىقشا تالاپتار قويمايمىز. زاڭ اياسىندا سەرتيفيكاتتاۋ, قاپتاماعا قاتىستى تالاپتار عانا بار. قازىر فەرمەرلىك تاۋارلارعا ارنالعان سورەلەرىمىز بار. جالپى تاۋار ءوندىرۋشى, جەتكىزۋشى جانە ءبىزدىڭ ارامىزدا كەلىسىم-شارت جاساسۋ ورتا ەسەپپەن 2 اپتاعا سوزىلادى», – دەدى «Small Skif» ساۋدا جەلىسىنىڭ وكىلى سۆەتوسلاۆ لاتينين.

ساۋدا جەلىلەرى وكىلدەرىنىڭ ءسوزىن قر ساۋدا جەلىلەرى وداعى توراعاسىنىڭ ورىنباسارى ەرلان جايلاۋباي تۇيىندەدى. «Made in KZ» تاۋارلارىن ساۋدا جەلىلەرى بەلسەندى قولدايدى. وسى باعىتتاعى جۇمىستى ساۋدا كوميتەتىمەن بىرلەسە اتقارامىز», – دەدى ول.

كاسىپكەرلەر قانداي قيىندىققا كەزىگەدى?

الايدا جيىنعا قاتىسقان وتاندىق تاۋار وندىرۋشىلەر ساۋدا جەلىلەرىمەن كەلىسىم-شارت جاساسۋدا قيىندىققا تاپ بولاتىنىن ايتتى.

«ءبىز شىمكەنتتە تريكوتاج ءونىم شىعارامىز. ءبىزدىڭ ونىمدەرىمىز «Small» ساۋدا جەلىسىندە بار. الايدا «Magnum» ساۋدا جەلىسىمەن 2021 جىلدان بەرى كەلىسىم-شارت جاساي الماي كەلەمىز. ءتۇرلى سىلتاۋ ايتىپ, كەلىسىم-شارت جاساسۋدان نەگىزسىز باس تارتادى», – دەدى كاسىپكەر نۇرتاس جاللالاددين.

ساۋدا مينيسترلىگى قانداي شارا قولدانادى?

وتاندىق ءونىم وندىرۋشىلەردىڭ تالاپ-تىلەگىن تىڭداعى قر سيم ساۋدا كوميتەتى توراعا ورىنباسارى ەرنۇر بوكەنباي ۇلى ساۋدا زاڭناماسىن بۇزعان, وتاندىق ءونىم وندىرۋشىلەرگە باسىمدىق بەرگىسى كەلمەيتىن ساۋدا جەلىلەرىنە اكىمشىلىك شارا قولداناتىنىن جەتكىزدى.

«ەستەرىڭىزگە سالايىن, ساۋدا جانە ينتەگراتسيا مينيسترلىگىندە وتاندىق تاۋار وندىرۋشىلەرمەن كەلىسىم-شارت جاساۋدان نەگىزسىز باس تارتقان ساۋدا سۋبەكتىلەرىن جاۋاپكەرشىلىككە تارتۋ قۇزىرەتى بار. قر اكىمشىلىك قۇقىق بۇزۋشىلىق تۋرالى كودەكستىڭ 201 بابى بويىنشا اكىمشىلىك جازا قولدانامىز», – دەدى ول.

مىسال: زاڭنامانى بۇزعاندارعا قانداي جازا قولدانىلدى?

مۇنداي كەيستىڭ ساۋدا كوميتەتىنىڭ تاجىريبەسىندە بار ەكەنىن ايتا كەتكەن ءجون. ساۋدا كوميتەتىنىڭ ماڭعىستاۋداعى دەپارتامەنتى كاسىپكەردىڭ وتاندىق ءونىمىن ساۋدا سورەسىنە قويۋدان نەگىزسىز باس تارتقان ساۋدا جەلىسىن سوت ارقىلى اكىمشىلىك جاۋاپكەرشىلىككە تارتىپ, ايىپپۇل سالعان بولاتىن.

جيىن قورىتىندىسى بويىنشا استانا, الماتى, شىمكەنت جانە وبلىستاردىڭ كاسىپكەرلىك باسقارماسىنا وڭىرلىك ساۋدا دەپارتامەنتتەرىمەن بىرلەسىپ, جەرگىلىكتى وتاندىق ءونىم وندىرۋشىلەر مەن ساۋدا جەلىلەرىنىڭ قاتىسۋىمەن قازاقستاننىڭ بولشەك ساۋدا جەلىلەرىنە وتاندىق تاۋار وندىرۋشىلەردىڭ ونىمدەرىن ىلگەرىلەتۋ بويىنشا وڭىرلىك كەڭەستەردى ۇيىمداستىرۋ, ساۋدا جەلىلەرىنە وتاندىق ءونىم وندىرۋشىلەردىڭ ساۋدا الاڭدارىنا قولجەتىمدىلىگىن رەتتەيتىن زاڭنامانى ساقتاۋ مونيتورينگىن جۇرگىزۋ تاپسىرىلدى.