جاڭالىقتار
وتباسى بانك جاڭا يپوتەكالىق باعدارلامانى ىسكە قوستى
فوتو: اشىق دەرەككوز
«وتباسى بانك» پەن الماتى وبلىسىنىڭ اكىمدىگى وڭىرلىك «الاتاۋ» تۇرعىن ءۇي باعدارلاماسىن ىسكە قوستى, – دەپ حابارلايدى qandastar.kz.
باعدارلاماعا دەنساۋلىق ساقتاۋ, ءبىلىم بەرۋ, مادەنيەت, سپورت, ەنەرگەتيكا, كوممۋنالدىق شارۋاشىلىق, الەۋمەتتىك سالا قىزمەتكەرلەرى, سونداي-اق مەملەكەتتىك قىزمەتشىلەر قاتىسا الادى (تۇرعىن ءۇي تولەمىن الاتىن كۇشتىك قۇرىلىمدار قىزمەتكەرلەرىنەن باسقا).
«الاتاۋ» باعدارلاماسىنىڭ شارتتارى:
-
نەسيە سوماسىنىڭ ەڭ جوعارى مولشەرى – 30 ميلليون تەڭگەگە دەيىن;
-
باستاپقى جارنا – 10%-دان باستاپ;
-
سىياقى مولشەرلەمەسى – جىلدىق 5% (جتسم 5,1%-دان 6,9%-عا دەيىن);
-
ساتىپ الىناتىن تۇرعىن ءۇي – الماتى وبلىسىنداعى العاشقى نارىقتاعى پاتەرلەر.
قاتىسۋشىلارعا قويىلاتىن نەگىزگى تالاپتار:
-
جاسى – 18-دەن 60 جاسقا دەيىن;
-
ءوزى مەن وتباسى مۇشەلەرىنىڭ اتىنا تىركەلگەن تۇرعىن ءۇيدىڭ نەمەسە ۇلەستىڭ بولماۋى;
-
ساتىپ الۋ قۇقىعىمەن جالعا بەرىلەتىن باسپاناعا يە بولماۋى;
-
الماتى وبلىسىندا كەمىندە 24 اي رەسمي ەڭبەك ءوتىلى جانە مىندەتتى زەينەتاقى اۋدارىمدارىنىڭ بولۋى.
ىرىكتەۋ قالاي وتەدى?
وتىنىشتەر الماتى وبلىسىنىڭ تۇرعىن ءۇي-كوممۋنالدىق شارۋاشىلىعى جانە اباتتاندىرۋ باسقارماسىندا قابىلدانادى. مەكەنجايى: قوناەۆ قالاسى, قوناەۆ داڭعىلى 7/2, 1-قابات.
وزىڭىزبەن بىرگە كەلەسى قۇجاتتار بولۋى قاجەت:
-
جەكە كۋالىك;
-
بەلگىلەنگەن ۇلگىدەگى قاعاز تۇرىندەگى ءوتىنىش;
-
ەڭبەك ءوتىلىن راستايتىن جۇمىس ورنىنان انىقتاما;
-
كورسەتىلگەن ەڭبەك ءوتىلى كەزەڭىندەگى زەينەتاقى اۋدارىمدارى تۋرالى انىقتاما;
-
ءوتىنىش بەرۋشىنىڭ جانە وتباسى مۇشەلەرىنىڭ (جۇبايى, كامەلەتكە تولماعان بالالارى) اتىنا قازاقستان رەسپۋبليكاسىنىڭ اۋماعىندا تۇرعىن ءۇي تىركەلمەگەنىن راستايتىن انىقتاما;
-
سپورتشىلار ءۇشىن: الەم چەمپيوناتى مەن ازيا ويىندارىنىڭ چەمپيونى/جۇلدەگەرى مارتەبەسىن راستايتىن قۇجاتتار;
-
بالالاردىڭ تۋ تۋرالى كۋالىگى;
-
نەكەنى تىركەۋ تۋرالى كۋالىك.
قاتىسۋشىلار ءتىزىمىن اكىمدىك جانىنان قۇرىلعان تۇرعىن ءۇي كوميسسياسى جاساقتايدى. كوميسسيا وكىلدەرى وتىنىشتەردى بالدىق جۇيە بويىنشا باعالايدى. مۇندا نەكەدە بولۋى, بالالار سانى جانە ەڭبەك ءوتىلى ەسكەرىلەدى. كەيىن باعدارلاما قاتىسۋشىلارىنا وتباسى بانككە نەسيە ءوتىنىمىن تاپسىرۋ ءۇشىن جولداما بەرىلەدى.
