«وتباسى بانككە» رەسمي مارتەبە بەرىلمەك

فوتو: اشىق دەرەككوز

ونەركاسىپ جانە قۇرىلىس مينيسترلىگى ۇكىمەت قاۋلىسىنىڭ جوباسىن جاريالادى, دەپ جازادى qandastar.kz

«30 قازاندا پارلامەنت ءماجىلىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي ساياساتىن رەفورمالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قابىلدادى. زاڭ جوباسى اياسىندا وتباسى بانكىنە ازاماتتاردى ەسەپكە قويۋ جانە ونى جۇرگىزۋ, سونداي-اق تۇرعىن ءۇيدى ءبولۋ جونىندەگى جەرگىلىكتى اتقارۋشى ورگانداردىڭ فۋنكتسيالارىن بەرە وتىرىپ, ۇلتتىق دامۋ ينستيتۋتى مارتەبەسىن بەرۋ ۇسىنىلادى», – دەپ جازىلعان قۇجاتتىڭ تۇسىندىرمە جازباسىندا.

اتالعان زاڭ جوباسى بويىنشا باسپانا كەزەگىنە قويۋ, كەزەكتىڭ ساقتالۋىن قاداعالاۋ, كەزەكتەگىلەرگە تۇرعىن ءۇي ۇيلەستىرۋ جۇمىستارى «وتباسى بانك» پەن سونىڭ جانىنان قۇرىلاتىن تۇرعىن ۇيمەن قامتۋ ورتالىعىنا بەرىلەدى.

قۇجاتتى ءماجىلىس سەنات ۇسىنعان وزگەرىستەرمەن بىرگە قابىلداپ, پرەزيدەنتكە جولداعان بولاتىن.