«وتباسى مۇشەسىن ولتىرمەگەن»: سوت بيشىمباەۆتى اكەلىك قۇقىقتان ايىرۋدان باس تارتتى

فوتو: جوعارعى سوت

ازاماتتىق نەكەدەگى ايەلىن اسا قاتىگەزدىكپەن ولتىرگەنى ءۇشىن 24 جىلعا سوتتالعان ەكس-مينيستر قۋاندىق بيشىمباەۆتىڭ بۇرىنعى ايەلى نازىم قاحارمان بالالارىنىڭ اكەسىن اتا-انا قۇقىعىنان ايىرۋ ءۇشىن باس پروكۋراتۋرا مەن جوعارعى سوتقا جۇگىندى. بۇل تۋرالى Qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

نازىم قاحارمان استانادا وتكەن ءباسپاسوز كونفەرەنتسياسىندا بيشىمباەۆتى اتا-انا قۇقىعىنان ايىرىپ, بالالارىنىڭ تەگىن اۋىستىرۋ ءۇشىن سوتقا ارىز جازعانىن ايتتى. الايدا سوت ونىڭ بۇل ارىزىنان باس تارتقان. ايتۋىنشا, ەكس-مينيستر سالتانات نۇكەنوۆامەن ازاماتتىق نەكەدە تۇرعاندىقتان, بيشىمباەۆ وتباسى مۇشەسىن نەمەسە جاقىنىن ولتىرگەن جوق دەپ سانالادى. الايدا نازىم بالالارىنىڭ سالتاناتتى وتباسى مۇشەسى جانە اكەسىنىڭ ايەلى رەتىندا قابىلداعانىن ايتتى.

«وكىنىشكە قاراي, بارلىعىن ايتىپ, كومەك سۇراۋعا ءماجبۇرمىن. مەنىڭشە, سوتتىڭ ارىزىمدى قابىلداماۋى ادىلدىككە جاتپايدى. سوتتىڭ نازارىن اۋدارۋ ءۇشىن قوعامعا, باس پروكۋراتۋراعا جانە جوعارعى سوتقا جۇگىنەمىن. مىندەتتى تۇردە اپپەلياتسيالىق سوتقا بەرەمىن. ويتكەنى مەن ءۇشىن بالالارىمنىڭ بولاشاعى, قىزىعۋشىلىقتارى مەن تۇلعا رەتىندە قالىپتاسۋى ماڭىزدى. بالالار سالتانات نۇكەنوۆانى وتباسى مۇشەسى رەتىندە قابىلداعانىن دالەلدەدىك. الايدا سوت مۇلدەم باسقا شەشىم شىعاردى», – دەدى نازىم قاحارمان.

ايتۋىنشا, بالالاردان جاۋاپ الىنعان, دەسە دە ونى ەشكىم ەسكەرمەدى.

«سۋديا بالالاردىڭ جاسقانشاق ەمەس ەكەنىن جانە ولاردىڭ مىنەز-قۇلقىنان پسيحولوگيالىق جاراقاتتى بايقامايتىنىن ايتتى. قۋاندىق بالالارىنىڭ وزىمەن, اتا-اپاسىمەن سويلەسكەنىن قالايدى. الايدا بالالار مۇنى قالامايدى. بالاردى ماجبۇرلەي المايسىڭ», – دەيدى نازىم قاحارمان.

ونىڭ ادۆوكاتى مادينا ۋاتبەكوۆانىڭ ايتۋىنشا, بيشىمباەۆ بىرىنشىدەن, ادام ولتىرگەندىكتەن, ەكىنشىدەن, بالالارعا پسيحولوگيالىق ءزابىر كورسەتكەندىكتەن ونى اتا-انا قۇقىعىنان ايىرۋ تۋرالى ارىز جازعان. الايدا سوت تا, پروكۋراتۋرا دا سالتانات نۇكەنوۆا مەن بيشىمباەۆ زاڭدى نەكەدە بولماعاندىقتان ول جاقىنىن نەمەسە وتباسى مۇشەسىن ولتىرمەدى دەگەن تۇجىرىمعا كەلدى.

«بۇل مۇلدەم دۇرىس ەمەس ءارى زاڭسىز. ەگەر اتا-انا قىلمىس جاساسا, مەملەكەت ونى اتا-انا قۇقىعىنان ايىرادى. وسىلايشا بالانى قورعايدى. بىراق سوت نەگە ەكپىندى «وتباسى مۇشەسى» دەگەن سوزگە قويىپ وتىر? نە سەبەپتى سوت كەز كەلگەن قىلمىس جاساعان ادامدى اتا-انا قۇقىعىنان ايىرمايدى», – دەيدى زاڭ وكىلى.

نازىم قاحارمان بالالارىنىڭ تەگىن اۋىستىرماق بولعان. بىراق سوت ونىڭ بۇل ارىزىن دا قابىلداماعان.