«Otyz jyl boıy bir adamnyń aýzyna qarap otyrdyq». Qoshanov eks-prezıdentti synap tastady

Foto: ashyq derekkóz

Májilis tóraǵasy Erlan Qoshanov el ishinde «Eski Qazaqstan» atalyp ketken elıta tusyndaǵy saıası ahýaldy synǵa aldy dep jazady qandastar.kz

Ertenmedia habarlaǵandaı,  ol tusta eldi bir ǵana adam bılep-tóstep turǵan, tıisinshe bútkil kapıtal da bir ǵana tulǵanyń tóńiregine shoǵyrlanǵan. Prezıdent Toqaevtyń saıası reformalaryn iske asyrýǵa arnalǵan jalpy otyrysta Qoshanov eks-prezıdenttiń eń úlken qateligin betine salyq qyp basty. «Sýperprezıdenttik júıe búkil eldi ashsa alaqanynda, jumsa judyryǵynda ustady. Otyz jyl boıǵy jalǵasqan bul úrdis aqyr sońy saıası tuıyqqa tireldi, narazylyq týdyrdy.

Sondyqtan úsh jyl buryn saıası júıeni túbegeıli jańǵyrtý qajettiligi týdy. Barlyq bılikti bir adamnyń qolyna bermeı, tepe-teńdik pen tejemelik mehanızmi bar jańa úlgi engizý asa mańyzdy qadam boldy», – deıdi Qoshanov. Sóı deı kele sońǵy úsh jylda atqarylǵan birqatar jetistikterdi jipke tize jóneldi. Aıta ketelik, búgin Toqaevtyń bılikke kelgenine alty jyl.