NEET jastary
«О́z isterińizdi súıińizder»: jastarǵa jiger jetispeıdi
Shymkent qalasynda NEET sanatyndaǵy jastar, ıaǵnı ne oqýy, ne jumysy joq qulyqsyz 14 myńǵa jýyq jetkinshek bar. "Jastardy áleýmettendirý jáne ońaltý" jobasynyń aıasynda "Adyrna"UEB QQ uıymdastyrýymen qoǵamda ornyn tappaı júrgen osyndaı jastardy yntalandyrý úshin ońtústikke belgili bloger men kásipkerler keldi.
Joba jastardyń jumys jáne oqýǵa kelgende belsendilik tanytpaý sebepteri, jobalyq keńse tarapynan jastarǵa kómek berý jáne kásibı baǵdarlaý túrleri, NEET jastarynyń qordalanǵan máseleleriniń sheshý joldaryn qarastyrýǵa baǵyttalǵan.
Is-shara jastardy bolashaq ómirlik josparlaryna yntalandyrý jáne shyǵarmashylyq áleýetti damytý baǵytynda iske asyryldy.
Atalmysh konferenııa Shymkent qalasynda, Jastar resýrstyq ortalyǵynda ótti. Shara qonaqtary belgili bloger, akter Nursultan Jaqsygen men kásipker, bloger Aqarys Ádiljan jastarǵa kásip ashýdyń qyr-syryn aıtyp, maqsatqa umtylýdaǵy tájirıbelerimen bólisti.
«Jastarǵa aıtarym, óz isterińizdi súıińizder. Nege deseńizder, adam ózinyń jany qalaǵan, súıikti isimen aınalysqanda jumys jasamaıdy, tek jasaǵan dúnıesinen lázzat alady. Máselen biz kezinde Jaıdarman oınap júrgenimizde jaı ǵana óz isimizden lázzat alyp, sol isti jaqsy kórgendikten jan tánimizben berile oınaıtynbyz. Sol ýaqytta sol dúnıeniń bizge artynsha tabys alyp keletinin, kásibimizdiń násip bolyp keletinin oılamappyz. Jaqsy kóretin dúnıemizdi jasadyq, barymyzdy saldyq, halyqtyń súıiktisine aınaldyq, ınstagram damyp bastady, kontentimizdi bastadyq, kórermenniń kóńilinen shyqtyq, osylaısha búginde blogerliktiń arqasynda nan taýyp júrmiz rasyna kelgende» dedi Nursultan Jaqsygen.
«Blogerlik te – kásip» deıdi konferenııa qonaqtary. Olardyń aıtýy boıynsha tipti búgingi tańdaǵy josparly maqsattarynyń kóbine blogerlikteriniń arqasynda jetip otyrǵandaryn aıta ketti.
Jas bolsa da óz kásibin dóńgeletip, sonymen birge blogerlikti de qatar alyp júrgen Aqarys Ádiljan Shymkenttik jastardyń aldynda óziniń keńesterimen bólisip, jetistikke jetemin degen adamnyń 10 qaǵıdasy jóninde aıtyp, jastarǵa jigerli sózderin joldady:
«Qazirgi tańda NEET sanatyndaǵy jastardyń kóbeıip ketýiniń sebebi, olardyń óz isterin taba almaýynda jáne óz-ózderin joǵaltyp alýynda. Ol úshin áýeli adam óz Ikıgaıyn, ıaǵnı janyna jaqyn isin taýyp sol arqyly qarajat tabýdy kózdeý qajet. Sonda ǵana ol ómir boıy jumys istegen bolmaıdy, tek ómirden lázzat ala otyra, tabys tapqan bolady. Men osy ýaqytqa deıingi oqyǵan kásipkerlik baǵyttaǵy kitaptarymda jıi baıqaıtynym, bul armandaý, maqsat koıý, nıet etý, áreket jasaý, jetistikke jetý. Osylaı ǵana adam balasy óz degenin oryndaı alady» dedi ol sózinde.
Aqarys Ádiljan jastarǵa aıtqan 10 qaǵıdasynda: ýaqyttyń qadiri; ómirlik mıssııa; súzgi; «ne qalaıtynymdy bilmeımin»; Ikıgaı; maqsatty durys qoıý; 5 ne úshin; 5 qalaı; hat jazýdy úırený, «Joq» degen sózden qoryqpaý týraly aıtty. Kózderinde jetistikke jetem degen jalyny bar jastar, Aqarystyń aıtqandaryn jazyp alyp, óz túıgenderi boıynsha suraq qoıyp, keńester aldy.
Kezdesýge Atameken kásipkerler palatasynan jáne Jumyspen qamtý ortalyǵynyń qyzmetkerler kelip qazirgi tańda ıdeıalary, óz bastamalary bar jastardy memleket qalaı qoldaıtyny jóninde túsindirme jumystaryn júrgizdi. Olarǵa jastar suraq qoıyp, kókeılerin mazalaǵan saýaldaryna jaýap aldy.
«NEET jastar toby ádette salǵyrt keledi. Olar biliktilik arttyrýǵa, jumys isteý men oqýǵa nıettenbeıdi. Olardyń kóbiniń synı oılaý daǵdylary tómen ári tutynýshylyq minez-qulqy basym bolady. Degenmen, elimizde NEET jastardy anyqtaý, olardyń muqtajdyqtaryn, qundylyqtaryn zertteý ádisnamasy zerdelenýi kerek. «Jastardy áleýmettendirý jáne ońaltý» jobasy QR Aqparat jáne qoǵamdyq damý mınıstrliginiń jáne Azamattyq bastamalardy qoldaý ortalyǵynyń qoldaýymen iske asyp jatyr. Negizgi maqsatymyz da osy. Iaǵnı atalmysh sanattaǵy jastardyń sanyn azaıtý, olardy jigerlendirý, bastamalaryn qoldaý, kómek kórsetý» dedi «Adyrna» qoǵamdyq qorynyń prezıdenti Arman Áýbákir.
Kezdesýde Shymkenttik belsendi Rústem Ashetaev sóz sóılep jastardyń qoǵamdaǵy ornyn, olardyń ómirdegi mıssııasy ne bolý kerektigin, olardyń qalyptasýyna qandaı ortanyń zor yqpal etetini jóninde aıta ketti:
«Adamnyń úsh ortasy bolady. Birinshisi, otbasy ıaǵnı onyń tárbıe alǵan mekeni, ekinshisi dostary, janynda jaqsylyqta da, qýanyshta da qatar júrgen jandary, úshinshisi osy ekeýinen tys ortasy. Iaǵnı adam osy úsh ortanyń qaısysymen jaqyn, sol adamdardyń qabiletterin, qasıetterin boıyna sińiredi, sáıkesinshe sondaı adam bolyp qalyptasady» dedi ol.
Is-shara sońynda kelgenderge arnaıy aqparattalǵan, jumyssyz jastar bazasyna tirkelý QR kody belgilengen broshıýralar úlestirildi.
