جاڭالىقتار
«ءوز قاتەلىگىن ولسە تۇسىنبەيتىن ەگويست»: ءلاززات احاتوۆا ءانارۋ قۇرمانالى تۋرالى بار شىندىقتى ايتتى
ادۆوكات ءلاززات احاتوۆا قوعامدا رەزونانس تۋدىرعان ءانارۋ قۇرمانالى ىسىنە بايلانىستى مالىمدەمە جاسادى. ول الەۋمەتتىك جەلىدە جابىرلەنۋشى تاراپپەن اراداعى جەكە حات الماسۋلاردىڭ سكريندەرىن جاريالاۋعا ءماجبۇر بولعانىن ايتتى, دەپ حابارلايدى qandastar.kz Azattyq Rýhy سايتىنا سىلتەپ.
احاتوۆا ءوزىنىڭ بۇل ىسكە نەگە ءۇنسىز كەلگەنىن ءتۇسىندىرىپ, «مايدا-شۇيدەمەن ەلدىڭ ميىن اشىتپاس ءۇشىن» كوپشىلىككە اشىق مالىمدەمە جاساماعانىن العا تارتتى. الايدا سوڭعى وقيعالار مەن جابىرلەنۋشى تاراپتىڭ ارەكەتتەرى ونى شىندىقتى ايتۋعا يتەرمەلەگەن.
«ەڭ باستى ايتارىم – زورلىق ورىن الدى. بۇل – اقيقات. ال تۇراروۆتى قولدايتىندار ءتۇرلى ورگانداردا وتىرعاندىقتان, قىلمىستىڭ اشىلۋىنا توسقاۋىل كوپ بولدى. ولاردىڭ ارالاساتىن ورتاسى, ءتىپتى وتباسىلارى دا ونىڭ ەسىرتكىگە تاۋەلدى ەكەنىن بىلەدى. بىراق بىزدە مۇنداي قىلمىستار كەز كەلگەن ادامعا قاتىستى اشىلا بەرمەيدى», – دەيدى ادۆوكات.
احاتوۆا ىستە تەك قۇقىق قورعاۋشى رولىندە عانا ەمەس, انا رەتىندە, پسيحولوگ رەتىندە دە ارالاسۋعا ءماجبۇر بولعانىن ايتتى. جابىرلەنۋشىنىڭ مىنەز-قۇلقى مەن ارەكەتتەرى ادۆوكاتقا مورالدىق تۇرعىدا اۋىر تيگەن.
«ال جابىرلەنۋشىگە كەلسەك… جاقسىلىقتى باعالاي المايتىن, وزىنە كەرەك كەزدە عانا جاقسى سويلەپ, ءوز قاتەلىگىن ولسە تۇسىنبەيتىن, تەك وزگەلەردى كىنالاۋعا, كاپريزدەرى ورىندالماسا, مانيپۋلياتسيا جاساۋعا بەيىم ەگويست ەكەن, قازىرگى جاستار.. سونى ۇقتىم», – دەيدى ول.
ادۆوكات بۇل ءىستى قىسقارتۋدان قۇتقارىپ, قايتا تەرگەۋ جۇمىستارى جۇرگىزىلگەنىن, بارلىق تالاپ-تىلەكتەرىن ىسكە اسىرعانىن اتاپ ءوتتى. ەندى بۇل كۇرەستەن كەيىن وزىنە ەشكىمنىڭ وكپە ارتپاۋىن سۇرايدى. احاتوۆا بۇل ءىستىڭ تەك ءبىر ادامنىڭ ماسەلەسى ەمەس, جۇيەلىك پروبلەما ەكەنىن جەتكىزدى.
«جەمقورلىق پەن تامىر-تانىستىق جايلاعان جۇيەدە ادىلدىككە جەتۋ وتە قيىن. جالعىز ءوزىم ءبارىن جەڭە المايتىنىم انىق», – دەدى ول.
سوڭىندا ادۆوكات ەل ىشىندە بۇل وقيعاعا قاتىستى تاراپتار ايتقان پىكىرلەر مەن ەموتسيالىق رەاكتسيالاردى ەسكەرە وتىرىپ, ءوز ءۋاجىن اشىق جەتكىزۋدى ءجون كورگەنىن مالىمدەدى.
«جەكە اڭگىمەلەردى جاريالايىن دەگەن نيەتىم جوق ەدى. ەرتەڭ سايتتار ءىلىپ اكەتسە, بىزگە تىلەۋلەس ەل تۇسىنبەي قالماسىن, مەنىڭ ءۋاجىمدى دا نازارعا السىن دەپ, سىزدەردەن ەشتەڭە جاسىرماۋدى ءجون كوردىم. سوڭعى كەزدەرى ىستەگى قيىندىقتاردان بولەك, باسقا نارسەلەردەن, جابىرلەنۋشىنىڭ ارەكەتتەرىنەن دە, اكەسىنىڭ ارەكەتتەرىنەن دە مورالنو شارشادىم.. بىلتىرعى تامىزدان بەرى وسى ىسكە قاتىستى نە وتپەدى باسىمنان?.. بىرەۋدىڭ وتباسىلىق پروبلەمالارىنا, قارىم-قاتىناستارىنداعى كۇردەلى جاعدايلار مەن وكپە-نالالارىنا ەرىكسىز كۋا بوپ, ارالاسۋعا دا ءماجبۇر بولىپپىن. ادۆوكات قانا ەمەس, پسيحولوگ, نيانيا دا بوپ كەتتىپپىن. سوندا دا ماماندىعىما ادال بولدىم. قىسقارعان ءىستى جانىمدى سالىپ, بۇزدىرتىپ, تەرگەۋگە بۇكىل تالابىمىزدى ورىنداتتىق. ەندى ەشكىمنىڭ وكپەسى جوق شىعار, ماعان?», – دەپ تۇيىندەدى احاتوۆا.
