جاڭالىقتار
وزبەكستاندا وتكەن فەستيۆالدە شەتەلدىكتەرگە قازاقتىڭ ۇلتتىق تاعامدارى ۇسىنىلدى
![](https://qandastar.kz/wp-content/uploads/2024/05/IMG_6184-780x405.webp)
تاشكەنتتە شەت مەملەكەتتەردىڭ ديپلوماتيالىق وكىلدىكتەرى اراسىندا مادەني ءداستۇر مەن ۇلتتىق تاعامداردىڭ XX فەستيۆالى ءوتتى, تاشكەنتتەگى مەنشىكتى ءتىلشىسى ءاليحان اسقار.
اۋقىمدى شاراعا وزبەكستان اۋماعىندا ەلشىلىگى ورنالاسقان بارلىق ەلدەر قاتىستى. ونىڭ بارىسىندا شەتەلدىكتەر ورتالىق جانە وڭتۇستىك-شىعىس ازيا ەلدەرى, اراب مەملەكەتتەرىنىڭ ۇلتتىق اسحاناسىنداعى تاعامداردان ءدام تاتىپ, ولاردىڭ دايىندالۋ جولدارىمەن تانىستى.
فەستيۆالدە حالقىمىزدىڭ ۇلتتىق تاعامدارى دا ۇسىنىلىپ, ولارعا سۇرانىس جوعارى بولدى.
«فۋد فەستيۆال جوعارى دەڭگەيدە ءوتىپ جاتىر. ونىڭ اياسىندا ءبىز سالت-ءداستۇرىمىزدى جانە ۇلتتىق تاعامدارىمىزدى تانىستىرىپ, كەلۋشىلەرگە ۇسىندىق. ەت, قۋىرداق, ىرىمشىك, جەنت, قۇرت, باۋىرساق سياقتى تاعامدارىمىزبەن قاتار, كوجە جانە شۇبات سۋسىندارىن اكەلىپ وتىرمىز. سونىمەن قاتار اشەكەيلەر دە بار, ولارعا جۇرتتىڭ قىزىعۋشىلىعى زور», – دەدى ۇلتتىق تاعامداردى ناسيحاتتاپ جۇرگەن قازاقستاندىق ءنۇريزا قابىلوۆا.
فەستيۆال اياسىندا قازاق اسحاناسىنىڭ تاعامدارىنان ءدام تاتقاندار ونىڭ بىرەگەيلىگى مەن ەرەكشەلىگىن اتاپ ءوتىپ, جوعارى باعا بەردى.
«قازاق تاعامدارى وزبەك اسحاناسىنا وتە ۇقساس كەلەدى. مەنىڭ ەڭ ءسۇيسىنىپ جەيتىن اسىم – ول ەت. تاشكەنتتىڭ وزىندە دە قازاقى ەتتى ءدامدى ازىرلەيتىن ورىندار از ەمەس. جالپى قازاق اسحاناسىن وتە ەرەكشە ءارى بىرەگەي دەپ سانايمىن. ويتكەنى, مۇندا كوبىنە ەت قولدانىلادى, ونىڭ ىشىندە جىلقى ەتى مول بولادى», – دەپ اسەرىمەن ءبولىستى فەستيۆالگە كەلۋشىلەردىڭ ءبىرى يۋلدۋز ازاموۆا.