Jańalyqtar
О́zbekstanda ótken festıvalde sheteldikterge qazaqtyń ulttyq taǵamdary usynyldy
![](https://qandastar.kz/wp-content/uploads/2024/05/IMG_6184-780x405.webp)
Tashkentte shet memleketterdiń dıplomatııalyq ókildikteri arasynda mádenı dástúr men ulttyq taǵamdardyń XX festıvali ótti, Tashkenttegi menshikti tilshisi Álıhan Asqar.
Aýqymdy sharaǵa О́zbekstan aýmaǵynda elshiligi ornalasqan barlyq elder qatysty. Onyń barysynda sheteldikter Ortalyq jáne Ońtústik-Shyǵys Azııa elderi, arab memleketteriniń ulttyq ashanasyndaǵy taǵamdardan dám tatyp, olardyń daıyndalý joldarymen tanysty.
Festıvalde halqymyzdyń ulttyq taǵamdary da usynylyp, olarǵa suranys joǵary boldy.
«Fýd festıval joǵary deńgeıde ótip jatyr. Onyń aıasynda biz salt-dástúrimizdi jáne ulttyq taǵamdarymyzdy tanystyryp, kelýshilerge usyndyq. Et, qýyrdaq, irimshik, jent, qurt, baýyrsaq sııaqty taǵamdarymyzben qatar, kóje jáne shubat sýsyndaryn ákelip otyrmyz. Sonymen qatar áshekeıler de bar, olarǵa jurttyń qyzyǵýshylyǵy zor», – dedi ulttyq taǵamdardy nasıhattap júrgen qazaqstandyq Núrıza Qabylova.
Festıval aıasynda qazaq ashanasynyń taǵamdarynan dám tatqandar onyń biregeıligi men ereksheligin atap ótip, joǵary baǵa berdi.
«Qazaq taǵamdary ózbek ashanasyna óte uqsas keledi. Meniń eń súısinip jeıtin asym – ol et. Tashkenttiń ózinde de qazaqy etti dámdi ázirleıtin oryndar az emes. Jalpy qazaq ashanasyn óte erekshe ári biregeı dep sanaımyn. О́ıtkeni, munda kóbine et qoldanylady, onyń ishinde jylqy eti mol bolady», – dep áserimen bólisti festıvalge kelýshilerdiń biri Iýldýz Azamova.