وزبەكستانعا بارعان تۋريستەردىڭ ءوزى ساقالىن قىرىپ تاستاۋعا ءماجبۇر – باق

فوتو: seminar-beauty.ru

سوڭعى كۇندەرى وزبەكستاندا ساقالعا قارسى رەيدتەر تاعى دا كۇشەيگەن. تاشكەنتتە ساقال قويعانى ءۇشىن بىرنەشە ەر ادامنىڭ اكىمشىلىك جاۋاپكەرشىلىككە تارتىلعانى ءمالىم بولدى, دەپ حابارلايدى Halyq Uni وزودليك راديوسىنا سىلتەمە جاساپ.

سوڭعى كۇندەرى وزبەكستاننىڭ اكىمشىلىك سوتتارىندا «قوعامدىق ورىنداردا جەكە باسىن انىقتاۋعا مۇمكىندىك بەرمەيتىن دارەجەدە بەتىن بۇركەۋ» دەگەن باپ بويىنشا ءىستىڭ قارالۋى جيىلەپ كەتكەن. سونىمەن قاتار, قۇقىق قورعاۋ ورگاندارىنىڭ تىكەلەي نۇسقاۋى بويىنشا بىرنەشە ەر ادامنىڭ ساقالىن كۇشتەپ قىرىپ تاستاعانى دا ءمالىم. كوبىنەسە مۇنداي جاعدايلار جيزاق, سامارقاند, ءاندىجان جانە فەرعانا وبلىستارىندا كەزدەسەدى.

ساقالىن قىرۋعا نەمەسە قىسقارتۋعا ءماجبۇر بولعانداردىڭ كوپشىلىگى – رەسمي ءدىني دارەجەسى جوق ءدىندارلار, قوعام بەلسەندىلەرى مەن ونەر ادامدارى. الايدا بۇل تىزىمدە شەتەلدىك تۋريستەر مەن پاريج وليمپياداسىنىڭ چەمپيوندارى دا بار ەكەندىگى انىقتالدى. ءوزىنىڭ اتى-ءجونىن جاريالاماۋدى وتىنگەن وليمپيادا چەمپيوندارىنىڭ ءبىرى پاريج وليمپيادا ويىندارى كەزىندە ساقالى بار وزبەك سپورتشىلارىنا پرەزيدەنتپەن بەينەبايلانىس الدىندا ساقالىن قىسقارتۋ تاپسىرىلعانىن ايتقان.

سونداي-اق وزبەكستانعا بارعان گەرمانيا ازاماتى الەۋمەتتىك جەلىدە تاشكەنتتە پوليتسيا قىزمەتكەرلەرى 3 جىلدان بەرى ءوسىرىپ كەلگەن ساقالىن قىرۋعا ماجبۇرلەگەنىن جازدى.

مۇمكىن بۇل سول كۇنى بارلىق جەردە جۇما نامازى وقىلعاندىقتان شىعار? كوشەدە پوليتسيا قىزمەتكەرلەرى كوپ بولدى. ولار مەنى توقتاتتى. مەن وزبەك ءتىلىن بىلمەيمىن, ولارمەن شالا ورىس تىلىندە سويلەستىم. مەنى ەش تۇسىندىرمەستەن پوليتسيا بولىمشەسىنە الىپ كەتىپ, ساقالىمدى نە ءوزىم قىرۋىم كەرەكتىگىن نەمەسە وزدەرى قىراتىندىعىن ايتتى, – دەپ جازدى شەتەلدىك تۋريست.

وزبەكستان ۇلتتىق تەلەراديوكومپانياسى قىزمەتكەرلەرىنىڭ ءبىرىنىڭ ايتۋىنشا, ونەر ادامدارىنا دا ەفيرگە ساقال قويىپ شىعۋعا بەيرەسمي تۇردە تىيىم سالىنعان. ول بۇل تىيىمنىڭ مەملەكەتتىك ەمەس تەلەارنا قىزمەتكەرلەرىنە دە قاتىستى ەكەنىن ايتتى.

شىلدە ايىندا ساقالىنىڭ وسۋىنە بايلانىستى ءانشى شوحجاحون دجۋراەۆتى Zoʻr تەلەارناسىنداعى «ارتيست» جوباسىنا قاتىسۋعا جىبەرمەگەن. سودان كەيىن ول ساقالىن تولىعىمەن قىرىپ, شوۋدىڭ قازىلار القاسىندا وتىرۋعا ءماجبۇر بولىپتى.

بۇگىندە وزبەكستاننىڭ قۇقىق قورعاۋ ورگاندارىندا «اكىمشىلىك جاۋاپكەرشىلىك تۋرالى كودەكسكە وزگەرتۋلەر ەنگىزۋ تۋرالى» زاڭى بويىنشا 789 ءىس سوت قاۋلىلارىنىڭ دەرەكتەر بازاسىندا جاتىر ەكەن.