وزبەكستاننان قىزىلورداعا جول سالىنۋى مۇمكىن

فوتو: اشىق دەرەككوز

پارلامەنت ءماجىلىسىنىڭ دەپۋتاتى مارحابات جايىمبەتوۆ ءماجىلىستىڭ جالپى وتىرىسىندا پرەمەر-ءمينيستردىڭ ءبىرىنشى ورىنباسارى رومان سكليارعا «ۇشقۇدىق-قىزىلوردا» باعىتى بويىنشا اۆتوموبيل جولىن سالۋ بويىنشا دەپۋتاتتىق ساۋال جولدادى, دەپ حابارلادى Qandastar.kz.

«ەجەلدەن ەنشىلەس, تاريحى تامىرلاس ەكى ەل – تاۋەلسىز قازاقستان مەن وزبەكستان اراسىنداعى ساياسي, ەكونوميكالىق تىعىز قارىم-قاتىناس جاڭا كەزەڭدە وربۋدە. بۇگىنگى تاڭدا ەكى ەل اراسىنداعى ساۋدا جانە تاۋار اينالىمى جىلدان جىلعا ارتىپ كەلەدى, – دەلىنگەن ساۋالدا.

دەپۋتات وسىعان وراي وزبەكستانعا توتە جولمەن بارۋعا قىزىلوردا وبلىسىنان اقىلى اۆتوموبيل جولىن سالۋدىڭ ماڭىزدىلىعى مەن قاجەتتىلىگى كۇن سايىن ارتىپ كەلە جاتقانىن العا تارتتى.

وعان بىرنەشە فاكتور بار. بىرىنشىدەن اۋىلشارۋاشىلىق جانە ونەركاسىپ ونىمدەرىن تاسىمالداۋعا دۇرىس باعىت بولسا, ول ءتۋريزمنىڭ دە دامۋىنا اسەر ەتەدى. وندا وزبەكستاننىڭ بۇقارا, سامارقان قالالارىنا كەلگەن تۋريستەر ساپارىن قىزىلورداداعى قورقىت بابامىزدان باستاپ, ۇلىتاۋ وبلىستارىنا دەيىن جالعاستىرۋعا مۇمكىندىك الادى. وسىلايشا, بۇل ءوڭىر ءتۋريزمىن دامىتۋعا وڭ سەرپىلىس بەرە الاتىن حالىقارالىق جول بولادى. ال ۇلىتاۋ ءوڭىرىنىڭ تۋريستىك الەۋەتى وتە جوعارى. ەكىنشىدەن الداعى ۋاقىتتا «قىزىلوردا-جەزقازعان» تراسساسى ارقىلى استانا قالاسىنا تىكەلەي جول قاتىناسى اشىلىپ, رەسەي فەدەراتسياسىنا شىعۋعا مۇمكىندىك بەرەدى. رەسپۋبليكالىق ماڭىزى بار «سامارا-شىمكەنت» اۆتوموبيل جولىنان باستاۋ الىپ, قىزىلوردا قالاسى ارقىلى وزبەكستان رەسپۋبليكاسىنىڭ «كوكاياز» ەلدى مەكەنىنە دەيىن, ۇزىندىعى 179 كم, 2 جولاقتى, قوزعالىس بولىگىنىڭ ەنى 9 مەتر قۇرايتىن ءىى-ساناتتاعى اۆتوموبيل جولى تۇسەدى. ۇشىنشىدەن وسى اۆتوموبيل جولىنىڭ قۇرىلىسى ىسكە اسىرىلعان جاعدايدا ەكى ەل اراسىنداعى اۆتوكولىك قاتىناسىنداعى اراقاشىقتىق شامامەن 1330 كم (قىزىلوردا قالاسىنان ەسەپتەگەندە) قىسقارىپ, ساۋدا اينالىمىنىڭ كولەمى بىرنەشە ەسەگە وسەتىن بولادى, – دەدى م.جايىمبەتوۆ.

ءماجىلىس دەپۋتاتى جوعارىدا ايتىلعان ماسەلەلەردى ەسكەرە كەلە, «ۇشقۇدىق ء(ور) – قىزىلوردا (قر)» باعىتى بويىنشا اۆتوموبيل جولىن سالۋ جوباسىن كەزەك كۇتتىرمەي باستاۋ قاجەت دەپ ەسەپتەيدى.