وزبەكتەر وليمپيادا التىنىن ساتىپ الدى ما?

بوكستان وزبەكستان كومانداسىنىڭ باس جاتتىقتىرۋشىسى تولقىن قىلىشەۆ YouTube جەلىسىندەگى «ۋاقىت كورسەتەدى» ارناسىنا بەرگەن سۇقباتىندا شاكىرتتەرىنىڭ وليمپياداداعى جەتىستىكتەرى تۋرالى پىكىر ءبىلدىردى, دەپ حابارلايدى  qandastar.kz Dopmedia.kz-كە سىلتەمە جاساپ.

«وليمپيادادا بەس التىنعا يە بولدىق… قولىنان كەلمەگەندەر ءار نارسەنى ايتىپ جاتىر. نە دەپ ايتقىسى كەلەتىنىن بىلمەيدى. امال جوق, وسىلاي دەپ ايتادى. ەگەر وزدەرى چەمپيون بولسا, ولاردىڭ جەڭىمپاز بولعانى ەسەپتەلەدى دە, بىزدىكى ەسەپتەلمەي مە?!

ءبىز جەتى التىن الامىز دەپ كۇش سالدىق. ءبىزدىڭ جەتى بالامىزعا قازىرگى ۋاقىتتا الەمدە تەڭ كەلەر مىقتى جوق دەپ نىق سەنىممەن ايتا الامىن. كەز كەلگەنىنە جاۋاپ بەرەمىن. جارىستى ورتا جولدان اياقتاعان رۋسلان مەن تۋرابەك تە جەڭىسكە لايىق ەدى. ءتىپتى ءبىز جەتى التىن مەدال الاتىن ەدىك. مەن وسى ۋاقىتقا دەيىن بۇل نارسەنى ايتىپ كەلدىم.

قازاقستاننىڭ بلوگەرلەرى دە: «تولقىن بەس التىن الامىن دەپ جاتىر», – دەپ كۇلگەن ەدى. مەن بەس ەمەس, جەتى التىن العىم كەلدى. بىراق بەس التىن ەنشىلەدىك. مەن قاتتى كەتىپ وتىرعان جوقپىن, تەك ىشىمدەگى دۇنيەنى ايتتىم», – دەدى تولقىن قىلىشەۆ.