جاڭالىقتار
وزەننەن تروس ارقىلى وتپەك بولىپ, سۋعا قۇلاعان ەر ادامنىڭ دەنەسى تابىلدى
10 مامىر كۇنى جەتىسۋ وبلىسى كەربۇلاق اۋدانىندا كوكسۋ وزەنىنىڭ ءبىر جاعىنان ەكىنشى بەتىنە تروس ارقىلى وتپەك بولعان ەر ادام ورتا جولدا اعىسقا قۇلاپ, جوعالىپ كەتكەن ەدى. بىرنەشە كۇن ىزدەۋدەن كەيىن اسكەري قىزمەتكەردىڭ دەنەسى تابىلدى, دەپ حابارلايدى Qandastar.kz سايتى.
جەتىسۋ وبلىسىنىڭ توتەنشە جاعدايلار دەپارتامەنتى ازاماتتىڭ دەنەسى 15 مامىردا تابىلعانىن مالىمدەدى.
«جەتىسۋ وبلىسىنىڭ كەربۇلاق اۋدانىندا وقيعا ورنىنان 15 شاقىرىم تومەن جەردە تجد جەدەل-قۇتقارۋ جاساعىنىڭ قۇتقارۋشىلارى ەر ادامنىڭ دەنەسىن تاۋىپ, سۋدان شىعارىپ الدى. تابىلعان كەزدە ول ءىشىنارا كيىمدە بولعان. ءمايىت پوليتسيا قىزمەتكەرلەرىنە بەرىلدى. سوت-مەديتسينالىق ساراپتاما تاعايىندالدى», – دەپ حابارلادى جەتىسۋ وبلىستىق تجد ءباسپاسوز قىزمەتى.
