ء“وزىمىز كونتسەرت قويىپ الامىز!” — كونتسەرتى شەگەرىلگەن ءانشىنىڭ جانكۇيەرلەرى الماتى كوشەلەرىندە جينالدى

الماتىدا جوسپارلانعان ماكس كورجدىڭ كونتسەرتى وتپەي قالعانىمەن, مىڭداعان تىڭدارمان قالانىڭ تۇكپىر-تۇكپىرىندە باس قوسىپ, ناعىز حالىقتىق شوۋعا اينالعان ەرەكشە كەش وتكىزدى, دەپ جازادى Qandastar.kz.

كەشكىسىن شىمبۇلاق, مەدەۋ مەن ساياباقتاردا ۇلكەن توپتار جينالىپ, الاۋ جاعىپ, سۇيىكتى اندەرىن بىرگە شىرقادى. الەۋمەتتىك جەلىلەرگە تاراعان بەينەجازبالاردان مىڭداعان ادامنىڭ ءبىر ىرعاقپەن ءان ايتىپ, ەرەكشە اتموسفەرا تۋدىرعانىن كورۋگە بولادى.

ۇيىمداستىرۋشىلاردىڭ كونتسەرتتى توقتاتۋى كوڭىلگە قاياۋ سالعانىمەن, تىڭدارماندار بۇل ءساتتى مەرەكەگە اينالدىرا ءبىلدى. شامامەن 40 مىڭعا جۋىق ادام ءبىر-بىرىنە قولداۋ كورسەتىپ, رەسمي ساحناسىز-اق كوتەرىڭكى كوڭىل كۇي سىيلادى.

جانكۇيەرلەردىڭ ايتۋىنشا, الماتىداعى بۇل بەيرەسمي كەزدەسۋ رەسمي كونتسەرتتەن كەم تۇسپەگەن. كەرىسىنشە, شىنايى ەموتسيا مەن ەركىن اتموسفەرا كەشتى ۇمىتىلماس ەتىپ قالدىرعان.

ەسكە سالساق, 6-قىركۇيەكتە وتەتىن ماكس كورجدىڭ ءان كەشى ۇيىمداستىرۋشىلار تاراپىنان توقتاتىلعان ەدى. بۇل جاڭالىققا قارسى بولعان جانكۇيەرلەر مەملەكەت باسشىسىنا دەيىن ۇندەۋ جاسادى.