О́zimnen jeti jas úlken balasy bar áıelge qatty ǵashyq boldym: Nurlan Álimjan eshqashan aıtpaǵan mahabbaty týraly aıtty

Foto: ashyq derekkóz

Kompozıtor, ánshi Nurlan Álimjan jeke ómirinde buryn sońdy aıtpaǵan syrymen bólisti, dep habarlaıdy qandastar.kz  Nur.kz-ke silteme jasap.

 «Ol sen emes, ol sen emes. Súıenishim bolǵan árkez. Ol sen emes, ol sen emes, Qanat bolǵan maǵan árkez…» Bul áýendi tyńdaǵan tyńdarman da, avtor da birden erekshe nostalgııaǵa bólenedi. Nurlan Álimjannyń aıtýynsha, «Ol sen emes» áni 2005 jyly jazylǵan. Ol kezde jas sazger stýdent edi. Al atalmysh týyndynyń basty keıipkeri – akter jigittiń burynǵy ǵashyǵy eken.

«19 jastaǵy balamyn. Sol jyldary ózimnen jeti jas úlken ónerdegi janmen mahabbat sezimi boldy. Ajyrasqan áıel, bir balasy bar edi. Ol maǵan ǵashyq, men de oǵan ǵashyqpyn. Onyń aty-jónin aıta almaımyn, óıtkeni gúr ete qalady, artyq áńgime ketedi. О́te tanymal adam, ony bári tanıdy. Bir jyldaı sol áıelmen júrdim. 19 jastaǵy balamyn, sol sezim ǵoı. Qatty basym aınalyp, ushyp júrdim. Almatynyń Alataýyna baryp aıǵaılap, shýlatyp júrgen kezder ǵoı», – dep bastady áńgimesin Nurlan Álimjan.

Keýdesinde mahabbat oty laýlaǵan ónerpaz jigit álgi ǵashyǵyna án arnaǵysy keledi.

«Ol kezde Almatydaǵy «Mamyr» shaǵynaýdanynan Ǵabıt Músirepov atyndaǵy balalar men jasóspirimder teatryna avtobýspen kele jatqanmyn, kólik joq. Eshqandaı mýzykalyq aspapsyz, sol qoǵamdyq kólikte án týdy. «Ol sen emes, ol sen emes, kózimnen uǵar menen tez. Ol sen emes, ol sen emes, keshir janym, meni kesh» dep óleń men áýen oıyma keldi. Sol avtobýsta ádemi qyzdar turdy. Bireýiniń kózine, bireýiniń sózine qaraımyn. Sosyn bir mezette «Oı, qoıyńdarshy, sender báribir ózimnen jeti jas úlken ǵashyǵyma jetpeısińder» degen oımen jazyldy. Ol kezde Nokia degen uıaly telefonym bar edi, sonyń dıktofonyna jazyp aldym. Jalpy, án degen quıylyp keledi. Bir jerden urlap, uıqastyryp, uıqas qýmaımyn. Keıde kólikte, keıde uıyqtap jatqanda áýen kele qalady, tipti keıde túsimde kóremin. Notaǵa túsirmeımin», – deıdi kompozıtor.

Nurlan Álimjan qandaı arýmen kóńil jarastyrsa da, jastaıynan jeke ómirindegi jańalyǵyn áýeli ata-anasymen bólisedi eken. Bul joly ózinen jeti jas úlken, balasy bar kelinshekke ǵashyq ekenin aıtqan sátte ákesi birden qarsylyq tanytqan.

«Balam, bulaı bolmaıdy. О́mir kór, keıin ýaqyt óte kele ózińniń jaryń tabylady. Qoı, myna mahabbatyń seni jaqsylyqqa aparmaıdy. Batamdy bere almaımyn, ómir súrip alsańshy, sen áli kishkentaı balasyń» dedi ákem. Sodan keıin men de kelistim. О́ıtkeni ákem bata bermese kóp nársege bara bermeımin. Áli kúnge deıin sondaımyn. Ákemmen de, anammen de aqyldasamyn. Ata-ananyń razylyǵyn alý kerek, ol dinde de aıtylǵan. Áıtpese jumaqqa kirmeısiń ǵoı. Biraq «Ol sen emes» áni álgi ózimnen jas jas úlken ǵashyǵymmen qoshtasý áni edi», — deıdi akter.

Bul ándi Nurlan Álimjan o basta lırıkalyq baǵytta jazsa, keıin Qaırat Nurtas kóńildi yrǵaqta jaryqqa shyǵarǵan.

• «Qaırattyń anasy Gúlzıra Aıdarbekova bir kúni habarlasty. Ol kezde «Aýyrmaıdy júrek» áni hıt bop jatty. «Nurlan, osy áninen keıin deńgeıin túsirmeıtindeı Qaıratqa án kerek. О́zińniń bir ánińdi bershi» dedi. Sosyn kezdestik, kóliktiń ishinde osy ándi gıtaramen oryndap berdim. «Ne degen keremet án» dedi Gúlzıra hanym. Sóıtip án men sózin berip, Qaırat Nurtasqa syılap kettim. Bul ándi satqan joqpyn. Men negizi ánderimdi satpaımyn, saýdaǵa salmaımyn. Ánderimdi kóbinese syıǵa tartatmyn, soǵan ózim raqattanamyn. Án jazý – meniń hobbıim», — deıdi sazger.