«پايداسىز ءتىل». قازاق ءتىلى تۋرالى پىكىر جازعان سپورتشىنىڭ باسى داۋعا قالدى

جەلىدە قازاق تىلىنە قاتىستى تاعى ءبىر داۋ شىقتى. بۇل جولى قاراعاندىلىق كيرا ەسىمدى سپورتشى قازاق ءتىلىن «پايداسىز» ءتىل دەگەنى ءۇشىن كەشىرىم سۇرادى, دەپ حابارلايدى  qandastar.kz Dalanews.kz-كە سىلتەمە جاساپ.

ءبارى سپورتشىنىڭ جەلىدەگى پىكىرگە جاۋاپ بەرۋىنەن باستالعان. ول «قازاق ءتىلىن ءبارى ءبىلۋى مىندەتتى» دەگەن پىكىرگە بۇل ازاماتتاردىڭ مىندەتى ەمەس ەكەنىن ايتقان.

«تاعى دا قايتالايمىن, قازاقستاندا ورىس ءتىلى جانە قازاق ءتىلى دەپ بولىنەدى. ورىستاردىڭ كوبىنە بۇل ءتىل مەن مادەنيەتى قىزىق ەمەس, ءوز تىلىڭىزدە سويلەڭىز. ءبىر نارسە جازۋدىڭ نە قاجەتى بار, پايداسى جوق ءتىل», — دەيدى سپورتشى.

ارتىنشا جەلى قولدانۋشىلارىنىڭ ءبىرى سپورتشى جاتتىعاتىن سپورت كلۋبىنا بۇل جاعداي تۋرالى ايتىپ, جاۋاپ بەرۋىن تالاپ ەتكەن.

ولار سپورتشىلارى ءۇشىن كەشىرىم سۇراپ, پروفيلاكتيكالىق اڭگىمە جۇرگىزىلگەنىن ايتقان.

جەلى رەاكتسياسى

قازاقستاندىقتار قۇقىق قورعاۋ ورگاندارى مەن سپورت مينيسترلىگىن تەگتەي باستاعان. ولار سپورتشىعا قاتىستى شارا قولدانۋدى سۇرادى.

تاعى ءبىر جەلى قوودانۋشىسى «قازاقتاردىڭ وزىنەن دە بار» دەيدى.

«تۇپكى سەبەبىن تۇسىندىڭىزدەر مە نەگە ولاي ايتىپ جاتقانىنىڭ? سەبەبى كوپ جەردە ءوزىمىز ورىسشا سويلەسەمىز, سونداقتاندا باسقالاردا ورىس ءتىلىن بيىك قويادى قازاق تىلىنە قاراعاندا. جەكە مەنىڭ ويىم».

ەندى ءبىرى مۇنداي مالىمدەمە جاسايتىن ادامدارعا ايىپپۇل سالۋ كەرەگىن ايتادى.

«وسىندايلارعا ۇلكەن ايىپپۇلدار سالۋ كەرەك. كەلەسى جولى ويلاناتىن بولادى». 

ارتىنشا سپورتشى كەشىرىم سۇرادى.

«دوستار, شىن جۇرەكتەن كەشىرىم سۇراعىم كەلەدى. جۋىردا مەن كوپتەگەن ادامداردىڭ كوڭىلىنە تيگەن پىكىر جازدىم. بۇل ويلانباي, دۇرىس ەمەس جازىلعان پىكىر بولدى. مەنىڭ سوزدەرىم قازاق ءتىلى مەن مادەنيەتىنە قورلاۋ رەتىندە قابىلدانۋى مۇمكىن ەكەنىن تۇسىنەمىن.مەن قازاقستاندا تۋىپ-ءوستىم. بۇل – مەنىڭ ەلىم, مەن بۇعان ماقتانامىن. قازاق ءتىلى – مەملەكەتتىك ءتىل, ول ءبىزدىڭ تاريحىمىزدىڭ, مادەنيەتىمىزدىڭ جانە بولمىسىمىزدىڭ ءبىر بولىگى. مەن ونداي پىكىر ايتۋعا حاقىم جوق ەدى. بۇل – مەنىڭ جەتىلمەگەندىگىمنىڭ بەلگىسى بولدى, جانە مەن بۇعان ۇيالامىن», — دەيدى سپورتشى.

ول بۇل جاعدايدان قورىتىندى شىعارعانىن ايتادى.

«قاتە كەتكەنىمدى تۇسىندىرگەن بارلىق ادامدارعا ريزامىن. مەن قورىتىندى جاسادىم جانە سوزدەرىمدە ۇقىپتى ءارى پاراساتتى بولۋعا تىرىسامىن. تاعى دا — پىكىرىممەن كوڭىلىنە تيگەن بارلىق جانداردان كەشىرىم سۇرايمىن. مەن ۇيرەنىپ جاتىرمىن جانە جاقسىراق ادام بولعىم كەلەدى», — دەيدى ول.

ايتا كەتەيىك, جاقىندا «زا تەبيا, باكە» (ZTB) مەديا جوباسىنىڭ نەگىزىن قالاۋشى, مەديامەنەدجەر مارعۇلان تۇرسىنوۆتىڭ باسى داۋعا قالعان بولاتىن. ءبارى ونىڭ Threads جەلىسىندە جازعان جازباسىنان باستالعان. قوعامدا ونىڭ مالىمدەمەسى ءالى كۇنگە دەيىن قىزۋ تالقىلانىپ جاتىر.