الەم جاڭالىقتارى
«پاكىستانداعى 300 قازاقتى قۇتقارۋ كەرەك». دەپۋتات ۇندەۋ جاسادى
فوتو: اشىق دەرەككوز
ءماجىلىس دەپۋتاتى ەرلان سايروۆ پاكىستانداعى قازاقتاردىڭ تاعدىرىنا الاڭداۋلى ەكەنىن ايتىپ, ولارعا شۇعىل كومەك كورسەتۋگە شاقىردى, دەپ حابارلايدى qandastar.kz
«پاكىستاننىڭ كاراچي قالاسىنان حاميت «جوراباي دەگەن قازاق باۋىرىمىز حابارلاستى. ونىڭ ايتۋىنشا, وسىدان 2 جىل بۇرىن 40 جانۇيا, 300 قازاق اۋعانستاننان پاكىستانعا بوسىپ بارعان. ولارعا قازاقستاننىڭ پاكىستانداعى ەلشىسى كەلىپ, جاعدايدى كورىپ, كومەكتەسۋگە ۋادە بەرگەن. 30 تامىز كۇنى پاكىستان وسى 300 قازاقتى قايتادان اۋعانستانعا دەپورتاتسيالايتىندارىن مالىمدەگەن»,—دەدى دەپۋتات.
«ادىرنا» ءتىلشىسى جازعانداي, سايروۆ بىردەن سىرتقى ىستەر مينيسترلىگىنە حابارلاسقانىن مالىمدەدى.
«ۆەدومستۆو بۇل جاعداي تۋرالى بىلەتىنىن, الايدا كومەكتەسە المايتىندارىن مالىمدەدى. ايتۋلارىنشا, ازاماتتاردىڭ قولىندا «ۇلتى قازاق» دەگەن انىقتاما جوق. بۇل ماسەلەنى شەشۋ ءۇشىن قايتادان اۋعانستانعا بارىپ, قاجەت انىقتامانى الۋ كەرەك ەكەن. ول ەلگە بارسا, جاعدايلارى وتە قيىن بولادى. سوندىقتان مەن ۇكىمەت باسشىسى ولجاس بەكتەنوۆكە, سىرتقى ىستەر ءمينيسترى مۇرات نۇرتىلەۋگە ۇندەۋ جاريالايمىن. قان سۋ ەمەس. ءبىز ءيىسى قازاقتى قۇتقارۋىمىز كەرەك. قۇرمەتتى ازاماتتار, 300 قازاقتى كوشىرۋگە جاعداي جاسايىق. ەگەر مۇمكىندىگىمىز بولماسا, بۇۇ بوسقىندار ىستەرى جونىندەگى جوعارعى كوميسسارى باسقارماسىنىنا ءوتىنىش جاساۋ كەرەك. ولار 300 قازاقتى بوسقىن رەتىندە مويىنداۋلارى كەرەك. سول كەزدە اتالعان ازاماتتاردىڭ قاۋىپسىزدىگى شەشىلەدى. قۇرمەتتى قاۋىم, قولداۋلارىڭىزدى سۇرايمىن!»—دەپ تولىقتىردى ول.
