جاڭالىقتار
«پالاتاسى ورتتەي ىستىق»: جاڭاارقا اۋرۋحاناسىنا تۇسكەن ايەل سوقىرىشەكتەن كوز جۇمدى
كوللاج: Azattyq Ruhy / ابىلقاسىم ەسەنتاەۆ
جاڭاارقادا سوقىرىشەكپەن سىرقاتتانىپ اۋرۋحاناعا تۇسكەن كوبالالى انا گۇلنۇر جۋانىشباەۆا وپەراتسيادان كەيىن كوز جۇمدى. مارقۇمنىڭ تۋىستارى ونىڭ ولىمىنە دارىگەرلەردىڭ سالعىرتتىعى سەبەپ بولدى دەپ وتىر. ولار بۇكىل دالەل-دايەكتىڭ ءبارىن جيناپ, اق حالاتتىلاردى جازالاۋدى سۇرادى, دەپ حابارلايدى qandastar.kz اقپارات پورتالى Azattyq Rýhy-نا سىلتەمە جاساپ.
گۇلنۇر جۋانىشباەۆا 4 بالانىڭ اياۋلى اناسى, 20 جىل بويى پوليتسيا كاپيتانى بولىپ ەڭبەك ەتكەن قۇرمەتتى قىزمەتكەر ەدى. ول بيىل 20 ساۋىردە «جەدەل گانگرەنوزدى اپپەنديتسيت» دياگنوزىمەن جاناارقا اۋداندىق اۋرۋحاناسىنا تۇسەدى. وتا كەزىندە انافيلاكسيالىق شوك بولىپ, كلينيكالىق ءولىم جاعدايىنا تۇسكەنى بولادى. دارىگەرلەر گۇلنۇردىڭ جۇرەك سوعىسىن قالپىنا كەلتىرگەنىمەن, 27 ساۋىرگە دەيىن كومادا جاتقان ايەل كوز جۇمادى.
ماقۇمنىڭ جاقىندارى ونىڭ ءولىمىنىڭ شىن سەبەبىن مەديتسينا قىزمەتكەرلەرى جاسىرىپ قالدى دەيدى. ولاردىڭ ايتۋىنشا, گۇلنۇرعا ەگىلگەن ءدارى-دارمەك ءتيىستى تەمپەراتۋرادا ساقتالماعان. قوراپ-قوراپ پرەپارات عيماراتتىڭ كىرەبىرىسىندە جەردە جاتقان.
«2025 جىلدىڭ 24 ساۋىرىندە جاڭاارقا اۋداندىق ورتالىق اۋرۋحاناسىنا ءدارى-دارمەكتەر جەتكىزىلدى. بىراق ولار ءتيىستى تەمپەراتۋرالىق رەجيمدە ساقتالماي, الدىڭعى كىرەبەرىستەگى تامبۋردا 5 كۇن بويى جاتقان. فوتو مەن ۆيدەودا – تسەفوتاكسيم, تسيپروفلوكساتسين, ماننيتول, ناتري حلوريد سەكىلدى ناۋقاستارعا قولدانىلاتىن ماڭىزدى پرەپاراتتار. بۇل دارىلەر جۋانىشباەۆا گۇلنۇرعا دا سالىندى. ول كەزدە گۇلنۇر كومادا جاتتى, مي ىسىگى مەن انافيلاكتيكالىق شوكتان كەيىن اۋىر حالدە بولعان», — دەدى ولار ۆيدەو دالەلدەمەسىندە.
مارقۇم كەلىنشەكتىڭ جاقىندارى ونىڭ پالاتاسى ورتتەي ىستىق بولدى دەپ ەسكە الادى. سول كەزدە وزدەرى شىرىلداپ ءجۇرىپ, تەرەزەلەردى جاۋىپ, بولمەنىڭ ىستىعىن 31°C-تان 27°C-قا دەيىن تۇسىرگەن.
رەداكتسيا قايعىلى جاعدايعا بايلانىستى ۇلىتاۋ وبلىسىنىڭ دەنساۋلىق ساقتاۋ باسقارماسىنان تۇسىنىكتەمە سۇراتتى.
باسقارما وكىلى اۋرۋحانا ديرەكتورىنا قاتاڭ سوگىس جاريالانعانىن ايتتى. سونىمەن قاتار, وزگە دە دارىگەرلەرگە قاتىستى جاۋاپكەرشىلىك سوت-مەديتسينالىق ساراپتاما قورىتىندىسى شىققان كەزدە ناقتىلادى.
«تەكسەرۋ بارىسىندا جاڭاارقا اۋداندىق كوپسالالى ورتالىق اۋرۋحاناسىنىڭ جۇمىسىندا بىرقاتار بۇزۋشىلىقتار انىقتالدى. ناۋقاس گ. ت. جۋانىشباەۆانىڭ قايتىس بولۋىنىڭ ناقتى سەبەبى سوت — مەديتسينالىق ساراپتاما جۇرگىزىلگەننەن كەيىن انىقتالاتىن بولادى. ساراپتاما اياقتالعانعا دەيىن ديرەكتوردىڭ ەمدەۋ جونىندەگى ورىنباسارى, حيرۋرگ, رەانيماتولوگ جانە ناۋقاستى ەمدەۋگە قاتىسقان مەيىرگەرلەر جۇمىستان ۋاقىتشا شەتتەتىلدى. اۋداندىق اۋرۋحانا ديرەكتورىنىڭ جاۋاپكەرشىلىگى وبلىستىق دەنساۋلىق ساقتاۋ باسقارماسىنىڭ تارتىپتىك كەڭەسىندە قارالدى جانە وعان باقىلاۋدىڭ جوقتىعى, اۋرۋحانا قىزمەتكەرلەرىنىڭ جۇمىسىنداعى انىقتالعان اقاۋلار ءۇشىن قاتاڭ سوگىس جاريالاندى», — دەدى ءوڭىردىڭ دەنساۋلىق ساقتاۋ باسقارماسىنان.
گۇلنۇردىڭ جاقىندارىنىڭ ايتۋىنشا, كوپبالالى انانى جەرلەۋ راسىمىنە وبلىستىق دەنساۋلىق ساقتاۋ باسقارماسىنىڭ دارىگەرلەرى كەلىپ, باتا وقۋعا 200 مىڭ تەڭگە بەرىپ كەتكەن.
«بۇل تەك ءبىزدىڭ وتباسىمىزدىڭ باسىنا تۇسكەن قاسىرەت ەمەس. ءبىزدىڭ قايعىمىز بۇكىل ايماقتاعى مەديتسينا سالاسىنداعى بىلىقتىڭ بەتىن اشىپ بەردى. ادىلەت سالاسىندا ىستەگەن ادام وسىنداي جاۋاپسىزدىقتان قايتىس بولسا, باسقاسى قايتپەك?», — دەيدى ولار.
قازىرگى ۋاقىتتا جاڭاارقا اۋدانىنىڭ پوليتسيا ءبولىمى مەديتسينا قىزمەتكەرلەرىنىڭ ءوز مىندەتتەرىن تيىسىنشە ورىنداماۋ فاكتىسى بويىنشا قىلمىستىق ءىس قوزعاعان.
«تەرگەۋ جۇرگىزىلۋدە. قىلمىستىق ءىس ۇلىتاۋ وبلىسى پد باسشىلىعىنىڭ قاتاڭ باقىلاۋىندا», — دەدى ءتيىستى ورگاننان.
