Paraqorlardyń tizimi endi ashyq jarııalanbaq

Parlamentte sybaılas jemqorlyqqa qarsy is-qımyl máseleleri boıynsha zańǵa engiziletin ózgerister men tolyqtyrýlar talqylanyp jatyr, dep habarlaıdy qandastar.kz

«Sybaılas jemqorlardyń jarııa tizilimin engizý. Bul – profılaktıkalyq qural. Onyń basty maqsaty – qoǵamdyq min taǵýmen, qoǵamda sybaılas jemqorlyqqa tózbeýshilikti qalyptastyrý. Tizilimde aýyr nemese asa aýyr sybaılas jemqorlyq qylmystar jasaǵany úshin sottalǵandar týraly málimetter qamtylatyn bolady. Sottyń zańdy kúshine engen aıyptaý úkimi tizilimge engizýge negiz bolmaq. Tiziliminen aqtaý úkiminiń zańdy kúshine enýi jáne sottylyqtyń ótelýi negizinde shyǵarý múmkin bolady. Tizilim Agenttiktiń saıtynda ornalastyrylatyn bolady. Tizilimdi júrgizýdi Agenttikke bekitý kózdelip otyr», – dedi Sybaılas jemqorlyqqa qarsy is-qımyly agenttigi tóraǵasynyń birinshi orynbasary Ulan Sarqulov.

Bul zań qabyldanǵan jaǵdaıda tizilimdi qalyptastyrý jáne júrgizý tártibi bekitiletin bolady. Tizimde jemqorlardyń aty-jóni, sybaılas jemqorlyq qylmys jasalǵan ýaqyttaǵy jumys orny men laýazymy, jemqorlyq qylmys quramy, aıyptaý úkiminiń derektemeleri jáne taǵaıyndalǵan jaza túri kórsetilýi múmkin.