پاريجدە پاراليمپيادا ويىندارىنىڭ اشىلۋ سالتاناتى ءوتتى

فوتو: سپورت جانە دەنە شىنىقتىرۋ ىستەرى كوميتەتى

سالتاناتتى ءىس-شارا فرانتسيانىڭ كەلىسىم الاڭىندا ءوتتى, دەپ جازادى qandastar.kz  اقپارات پورتالى.

اشىلۋ سالتاناتىندا قازاقستان تۋىن ۆولەيبولدى وتىرىپ ويناۋدان ۇلتتىق قۇراما مۇشەسى بەرىك ىزماعانبەتوۆ پەن پارا نىسانا كوزدەۋدەن سەۆدا اليەۆا ۇستاپ شىقتى.

جازعى پاراليمپيادا باسەكەسى فرانتسيا استاناسىندا العاش رەت وتكىزىلىپ وتىر. جارىسقا 4400-دەن استام سپورتشى قاتىسادى. ولارعا 2500 ادام كومەكتەسەدى. سايىس باعدارلاماسىنا 22 سپورت ءتۇرى مەن 549 ديستسيپلينا ەنگەن. ال ويىندار 11 كۇنگە جالعاسادى. بيىلعى باعدارلاماعا جاڭا سپورت تۇرلەرى قوسىلماعان. الايدا توكيو-2020 ويىندارىنىڭ باعدارلاماسىنا ەنگەن پارا بادمينتون قايتا ۇسىنىلىپ وتىر.

پاريجدەگى پاراليمپياداعا قازاقستان قۇراماسىنان 44 سپورتشى سىنعا تۇسەدى. بۇل – ەل تاريحىنداعى رەكوردتى كورسەتكىش. توكيو-2020 ويىندارىندا ەل نامىسىن 26 سپورتشى قورعاعان بولاتىن. ەل سپورتشىلارى ويىندارعا 1996 جىلدان بەرى تۇراقتى تۇردە قاتىسىپ كەلەدى.

بيىلعى پاراليمپيادادا قازاقستان ۇلتتىق قۇراماسىنىڭ سپورتشىلارى 9 سپورت تۇرىنەن (پارا دزيۋدو, پارا پاۋەرليفتينگ, پارا تاەكۆوندو, پارا جەڭىل اتلەتيكا, پارا نىسانا كوزدەۋ, پارا ۇستەل تەننيسى, پارا ءجۇزۋ, پارا كانوە جانە ۆولەيبولدى وتىرىپ ويناۋ) سىنعا تۇسەدى. وسى جىلى قازاقستاندىق سپورتشىلار پارا ۇستەل تەننيسىنەن جانە ايەلدەر اراسىندا پارا كانوەدەن العاش رەت پاراليمپيادا ليتسەنزياسىن جەڭىپ الدى.

ەل سپورتشىلارى ەرتەڭنەن باستاپ جارىس جولىنا شىعادى. 29 تامىزدا ميلانا كراساۆتسەۆا پارا تاەكۆوندودان ونەر كورسەتەدى, ال كەشكە ۆولەيبولدى وتىرىپ ويناۋدان قازاقستان قۇراماسى فرانتسيامەن شەبەرلىك بايقاسادى.