پاريجدە يۋنەسكو وكىلدەرى ناۋرىز مەرەكەسىن اتاپ ءوتتى

ءتۇرلى ۇلت پەن ۇلىستى ۇيىستىرعان ۇلىق مەرەكەدە ديپلوماتتار داستارحان جايىپ, 7 ءتۇرلى دامنەن ناۋرىز كوجە ازىرلەگەن. كونتسەرتتىك باعدارلاما ۇيىمداستىرىپ, اسەم ءان, كوركەم بيمەن مەرەكەنىڭ كوركىن اشا ءتۇستى. شارادا قازاقستاندىق «استانا سازى» ءانسامبلىنىڭ ارتىستەرى دە ونەر كورسەتتى. ناۋرىز مەرەكەسىن الەمدە 300 ملن-عا جۋىق حالىق تويلايدى.

ال رەسمي تۇردە ازيانىڭ 12 ەلى, ءۇندىستان, قىتاي, تۇركيا جانە يراك جۇرتى اتاپ وتەدى. بيىل بۇل ءتىزىم جاڭارىپ, قاتارعا موڭعوليا دا قوسىلدى. نيامحۋ ۋلامبايار, موڭعوليانىڭ فرانتسياداعى ەلشىسى: — موڭعوليادا جىل سايىن ءداستۇرلى ناۋرىز مەرەكەسىن اتاپ وتەتىن قازاقتاردىڭ ۇلكەن قاۋىمداستىقتارى بار. ءبىز دە ولارمەن بىرگە ۇلىق مەرەكەنى اتاپ ءوتىپ, ءارى قازاقتىڭ باي مادەنيەتىمەن تانىسۋعا مۇمكىندىك الامىز. ەندى ناۋرىزدى رەسمي تويلايتىن ەلدەر تىزىمىنە كىرەتىنىمىز ءبىزدى ەرەكشە قۋانتادى. سيمونا-ميرەلا ميكۋلەسكۋ, يۋنەسكو باس كونفەرەنتسياسىنىڭ پرەزيدەنتى: — مەن ناۋرىزناما تۇجىرىمداماسىن ەرەكشە قۇرمەتتەيمىن.

كوكتەمنىڭ كەلۋىمەن باستالاتىن وسى مەرەكەدە تەك جاقسى ويلار ويلاۋىمىز كەرەك. اسىرەسە, بۇل باستاما, ءبىز ءومىر ءسۇرىپ جاتقان قيىن زاماندا وتە ماڭىزدى. سونداي-اق وسى مەرەكەنى اتاپ وتەتىن ەلدەر ءتىزىمىنىڭ كەڭەيگەنى دە قۋانتادى.